មន្ត្រីបោះឆ្នោតក្នុងខេត្តចំនួន២ គឺខេត្តសៀមរាប និងខេត្តស្ទឹងត្រែង បានទទួលការបណ្ដុះបណ្ដាលពង្រឹងសមត្ថភាពអំពីនីតិវិធីនៃការដាក់ ការទទួល និងការដោះស្រាយពាក្យបណ្ដឹងក្នុងដំណើរការនៃការពិនិត្យបញ្ជីឈ្មោះ និងការលុបឈ្មោះបោះឆ្នោត ឆ្នាំ២០២៥ ដែលរៀបចំឡើងដោយគណៈកម្មាធិការជាតិរៀបចំការបោះឆ្នោត (គ.ជ.ប) នៅខេត្តសៀមរាប នាថ្ងៃទី១៣ ខែឧសភា ឆ្នាំ២០២៥នេះ។
ឯកឧត្ដម តុប ឬទ្ធី អគ្គនាយក អគ្គនាយកដ្ឋានសេវាកម្មច្បាប់ និងបច្ចេកទេសនៃគ.ជ.ប បានបញ្ជាក់ថា អនុលោមតាមច្បាប់ស្ដីពីការបោះឆ្នោតជ្រើសតាំងតំណាងរាស្ត្រ បទបញ្ជា និងនីតិវិធី ព្រមទាំងលិខិតបទដ្ឋានគតិយុត្តរបស់ គ.ជ.ប ដំណើរការនៃការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៥ មានរយៈពេល ៣ខែ ចាប់ផ្ដើមពីថ្ងៃទី១ ខែឧសភា ដល់ថ្ងៃទី៣១ ខែកក្កដា ឆ្នាំ២០២៥ ហើយក្នុងនោះការពិនិត្យបញ្ជីឈ្មោះ និងការចុះឈ្មោះបោះឆ្នោតនៅតាមឃុំសង្កាត់ទូទាំងប្រទេសមានរយៈពេល២៦ថ្ងៃ គិតចាប់ពីថ្ងៃទី១-២៦ ខែឧសភា ឆ្នាំ២០២៥។
ឯកឧត្ដម តុប ឬទ្ធី បានឱ្យដឹងថា វគ្គបណ្ដុះបណ្ដាលនេះ ផ្ដោតសំខាន់លើគោលការណ៍រួម ដូចជា៖ ទី១.នីតិវិធីនៃការដាក់ ការទទួល និងការដោះស្រាយពាក្យបណ្ដឹង, ទី២.របៀបប្រជុំសម្រេច និងវិធីសាស្ត្រនៃការតាក់តែងសេចក្ដីសម្រេច, ទី៣.ពិភាក្សាលើករណីសិក្សាទាក់ទងនឹងការដាក់ ការទទួល និងការដោះស្រាយពាក្យបណ្ដឹង ក្នុងដំណើរការនៃការពិនិត្យបញ្ជីឈ្មោះ និងការចុះឈ្មោះបោះឆ្នោត, ទី៤.អនុវត្តការសម្ដែងតួស្ដីពីការបើកប្រជុំសម្រេចនៅក្រុមប្រឹក្សាឃុំសង្កាត់ លើពាក្យបណ្ដឹង ជំទាស់ទាក់ទងនឹងបញ្ជីបោះឆ្នោតដំបូង។
ឯកឧត្ដមបន្តថា តាមរយៈវគ្គបណ្ដុះបណ្ដាលនេះដែរ គឺដើម្បីលើកកម្ពស់ការយល់ដឹងបន្ថែមដល់មន្ត្រីអនុវត្ត សំដៅធានាឱ្យការអនុវត្តរបស់មន្ត្រីជំនាញកាន់តែមានភាពត្រឹមត្រូវ ច្បាស់លាស់ និងផ្តល់ទំនុកចិត្តដល់គ្រប់ភាគីពាក់ព័ន្ធ។ ឯកឧត្តម ក៏បានណែនាំដល់គ្រូឧទ្ទេស ត្រូវយកចិត្តទុកដាក់ធ្វើបទបង្ហាញដោយពន្យល់ និងបកស្រាយចំណុចនីមួយៗឱ្យបានច្បាស់លាស់ ក្បោះក្បាយ និងតាមវិធីសាស្ត្រងាយៗ ដើម្បីឱ្យសិក្ខាកាមឆាប់ចាំ និងឆាប់យល់ ព្រមទាំងលើកទឹកចិត្តដល់សិក្ខាកាមទាំងអស់ចូលរួមក្នុងវគ្គបណ្ដុះបណ្ដាលនេះ ឱ្យបានពេញលេញដោយមិនត្រូវអវត្តមានឡើយ៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
