អាជ្ញាធរក្រុងសៀមរាប បានអំពាវនាវឱ្យប្រជាពលរដ្ឋចូលរួមទាំងអស់គ្នា ប្រមូល ទុកដាក់សំរាមឱ្យបានល្អ ធ្វើអនាម័យតាមលំនៅដ្ឋាន និងទីតាំងកម្មសិទ្ធិរបស់ខ្លួន ដើម្បីបរិស្ថានក្នុងមូលដ្ឋានស្អាត និងសុខភាពអនាម័យ ស្របនឹងពាក្យស្លោក ”ក្រុងសៀមរាប បរិស្ថានស្អាត“ ដែលជាប្រធានបទ ដែលរដ្ឋបាលក្រុងបានដាក់ចេញក្នុងវេទិកាផ្សព្វផ្សាយស្ដីពីការគ្រប់គ្រងសំណល់រឹង នៅព្រឹកថ្ងៃទី១៣ ខែឧសភា ឆ្នាំ២០២៥នេះ។
លោក ហាយ យង់ អភិបាលរងក្រុងសៀមរាប មានប្រសាសន៍ថា កន្លងមកយើងតែងតែខិតខំយកចិត្តទុកដាក់លើបញ្ហាបរិស្ថាននេះ ក៏ប៉ុន្តែយើងក៏សង្កេតឃើញនៅ មានសេសសល់បញ្ហាមួយចំនួនដូចជា ការមិនទាន់ចូលរួមញែកសំរាម វេចខ្ចប់ ទុកដាក់ និងបញ្ចេញឱ្យបានត្រឹមត្រូវ និងមានការគេចវេសមិនបង់ថ្លៃសេវាសម្អាត ប្រមូល ដឹកជញ្ជូន និងសេវាទីលានទុកដាក់សំរាមសំណល់រឹងជាដើម។ ម្យ៉ាងវិញទៀត ក៏មានការដុត បោះចោល និងកប់សំរាម សំណល់រឹងជាដើម ដែលទង្វើទាំងនេះជាអំពើល្មើសនឹងច្បាប់ ព្រមទាំងធ្វើឱ្យប៉ះពាល់ដល់សោភ័ណភាព បរិស្ថាន និងសុខភាពសាធារណៈ។
លោកបន្តថា ដើម្បីឱ្យយើងអនុវត្តបានស្របតាមប្រធានបទ ”ក្រុងសៀមរាប បរិស្ថានស្អាត“ សូមសំណូមពរដល់ប្រជាពលរដ្ឋក្នុងមូលដ្ឋាន គប្បីយកចិត្តទុកដាក់ចូលរួមឱ្យបានសកម្ម និងខ្លាំងក្លាក្នុងការបំពេញកាតព្វកិច្ចលើការងារគ្រប់គ្រងសំរាមសំណល់រឹង តាមរយៈការញែក វេចខ្ចប់ ទុកដាក់ បញ្ចេញសំរាមសំណល់រឹងឱ្យបានត្រឹមត្រូវ ដែលជាជំហានដ៏សំខាន់មួយសម្រាប់ការរស់នៅរបស់បងប្អូនប្រជាពលរដ្ឋ ដើម្បីធ្វើឱ្យបរិស្ថានក្នុងក្រុងសៀមរាបកាន់តែស្អាត សហគមន៍ស្អាត ផ្ទះស្អាត ដោយផ្ដើមចេញពីបុគ្គលម្នាក់ៗ បង្កើនសោភ័ណភាព និងភាពទាក់ទាញដល់ភ្ញៀវទេសចរ សំដៅបង្កើនប្រាក់ចំណូលដល់ប្រជាពលរដ្ឋនៅមូលដ្ឋាន៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
