នៅថ្ងៃទី០១ ខែមិថុនា ឆ្នាំ២០២៥នេះ លោក យុន លីនណេ អភិបាលរងខេត្តសៀមរាប បានអញ្ជើញចូលរួមក្នុងយុទ្ធនាការដាំដើមឈើតាមដងផ្លូវក្នុងក្រុងសៀមរាប នៃកម្មវិធីដំណើរទស្សនកិច្ចសិក្សាក្រោមប្រធានបទ “លើកកម្ពស់ចំណេះដឹងឆ្ពោះទៅរកសមិទ្ធផលប្រកបដោយប្រសិទ្ធភាព” របស់ក្រុមនិស្សិតថ្នាក់បរិញ្ញាបត្រសេដ្ឋកិច្ច និងគ្រប់គ្រង សិក្សាជាភាសាបារាំង និងអង់គ្លេស នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ដោយមានការចូលរួមពីថ្នាក់ដឹកនាំមន្ទីរទេសចរណ៍ កសិកម្ម រដ្ឋបាលក្រុង អាជ្ញាធរមូលដ្ឋាន ប្រជាការពារ និងអ្នកពាក់ព័ន្ធមួយចំនួនទៀត។
លោក យុន លីនណេ អភិបាលរងខេត្ត មានប្រសាសន៍ថា យុទ្ធនាការនេះ ជាការចូលរួមការពារបរិស្ថាន និងថែរក្សាដំណើរការប្រព័ន្ធអេកូឡូស៊ីក្នុងក្រុងសៀមរាប ដែលនឹងទទួលបានប្រយោជន៍ជារួមទាំងសុខភាព និងហេដ្ឋារចនាសម្ព័ន្ធដល់បងប្អូនប្រជាពលរដ្ឋ និងភ្ញៀវទេសចរប្រកបដោយនិរន្តភាព។ លោកបន្តថា ចលនាដាំដើមឈើនេះ ជាកាតព្វកិច្ចចម្បងផ្សារភ្ជាប់នឹងសេចក្ដីត្រូវការចាំបាច់នៃជីវភាពរស់នៅរបស់ពលរដ្ឋប្រកបរបរទទួលទាន និងនាំមកនូវរុក្ខជាតិបៃតងដ៏សែនមនោរម្យលើទឹកដីខេត្តសៀមរាប។
លោកអភិបាលរងខេត្ត ក៏បានអំពាវនាវដល់អាជ្ញាធរគ្រប់លំដាប់ថ្នាក់ បងប្អូនប្រជាពលរដ្ឋ និងបណ្ដាក្រុមហ៊ុន ដែលនៅអមសងខាងផ្លូវសូមចូលរួមថែទាំ ស្រោចទឹក និងដាក់ជី ដើម្បីឱ្យដើមឈើទាំងនេះលូតលាស់បានល្អ ជួយលើកកម្ពស់សោភ័ណភាពក្រុងសៀមរាប ឱ្យកាន់តែស្រស់ស្អាតបន្ថែមទៀត៕
រូបភាព៖ រដ្ឋបាលខេត្តសៀមរាប
