ក្រុមចុងភៅកម្ពុជា ខេត្តសៀមរាប ចំនួន៣ក្រុម ដណ្ដើមបានមេដាយចំនួន២១គ្រឿង សម្រាប់ការប្រកួតចុងភៅ លើវិញ្ញាសា Asian Gourmet Challenge ក្នុងកម្មវិធី Thailand Ultimate Chef Challenge 2025 ដែលរៀបចំឡើងនៅប្រទេសថៃ ដោយមានចុងភៅប្រមាណ ៧០០នាក់ មកពីប្រទេសចំនួន១៤ បានចូលរួមប្រកួតប្រជែង។
លោកស្រី ប៉ុល គឹមសាន ប្រធានសមាគមចុងភៅកម្ពុជា (CCA) ខេត្តសៀមរាប បានឱ្យដឹងថា ចុងភៅរបស់កម្ពុជា ចំនួន៣ក្រុម មាន១៤រូប បាននាំយកនូវលទ្ធផលដ៏ល្អសម្រាប់កម្ពុជា ក្នុងវិស័យម្ហូបអាហារ ដោយពួកគេបានឈ្នះមេដាយ មាស៦គ្រឿង មេដាយប្រាក់៧គ្រឿង និងមេដាយសំរឹទ្ធចំនួន៨គ្រឿង។ លោកស្រីថា នេះជាសមិទ្ធផលដ៏គួរឲ្យកោតស្ញប់ស្ញែង និងជាមោទកភាពសម្រាប់ប្រទេសកម្ពុជា។
លោកស្រី ប៉ុល គឹមសាន ក៏បានឱ្យដឹងដែរថា ការប្រកួតនេះធ្វើឡើងនៅប្រទេសថៃ មានរយៈពេល៥ថ្ងៃ ចាប់ពីថ្ងៃទី២៧ ដល់ថ្ងៃទី៣១ ខែឧសភា ឆ្នាំ២០២៥កន្លងទៅនេះ ដោយមានក្រុមចុងភៅប្រមាណ៧០០នាក់ មកពីប្រទេសចំនួន១៤ បានចូលរួមប្រកួតប្រជែង៕
ព័ត៌មានជាតិ ថ្មីៗ
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
