រយៈពេល៨ថ្ងៃ ចាប់ពីថ្ងៃទី២៣-៣០ ខែឧសភា ឆ្នាំ២០២៥កន្លងទៅនេះ គណៈប្រតិភូខេត្តសៀមរាប ដឹកនាំដោយ លោក ង៉ូវ សេងកាក់ អភិបាលរងខេត្ត តំណាងឯកឧត្តម ប្រាក់ សោភ័ណ អភិបាលសៀមរាប បានចូលរួមសន្និសីទអភិវឌ្ឍន៍ទេសចរណ៍ ២០២៥ នៅទីក្រុង Kuqa តំបន់ស្វយ័ត Xinjiang និងនៅទីក្រុងចីងចូវ ខេត្តហឺណាន សាធារណរដ្ឋប្រជាមានិតចិន ក្រោមប្រធានបទ “ស៊ីនជាំង គឺជាកន្លែងដ៏អស្ចារ្យមួយ”
សន្និសីទនេះ មានការចូលរួមពីប្រធានសមាគមជំរុញសេដ្ឋកិច្ច និងពាណិជ្ជកម្មអាស៊ាន និងអនុប្រធានសមាគម ក្រុមការងារសមាគម និងមានការចូលរួមអញ្ជើញឯកអគ្គរាជទូតបរទេស នៅក្នុងប្រទេសចិនពីបណ្ដាប្រទេស និងតំបន់នៅតាមបណ្ដោយផ្លូវសូត្រ អ្នកឯកទេសទេសចរណ៍ អ្នកបច្ចេកទេស អ្នកវិទ្យាសាស្ត្រ តំណាងអង្គការ និងវិស័យឯកជន។
សន្និសីទនេះ ក៏មានផ្សព្វផ្សាយអំពីធនធាន និងផលិតផលទេសចរណ៍នៃស៊ីនជាំង ការចរចារធុរកិច្ចរវាងសហគ្រាស និងការត្រួតពិនិត្យផ្លូវទេសចរណ៍នានា ព្រមទាំងបង្កើតវេទិកាផ្លាស់ប្ដូរទេសចរណ៍អន្តរជាតិ និងសហប្រតិបត្តិការជាសហគមន៍ ដើម្បីលើកកម្ពស់កិច្ចសហប្រតិបត្តិការទេសចរណ៍ពហុភាគី វិភាគយុទ្ធសាស្ត្រយ៉ាងសំខាន់នៃការអភិវឌ្ឍន៍ទេសចរណ៍ និងសម្របសម្រួលគំនិតបង្កើតផែនការពង្រីកការទំនាក់ទំនងនាពេលអនាគតផងដែរ។
ទន្ទឹមនឹងនេះ ដើម្បីពង្រឹងកិច្ចសហប្រតិបត្តិការ គណៈប្រតិភូខេត្តសៀមរាប ក៏បានជួបសម្ដែងការគួរសមជាមួយ អភិបាលក្រុង Shingzhou ខេត្តហឺណាន ដោយបានផ្លាស់ប្តូរយោបល់គ្នាលើការពង្រឹងកិច្ចសហប្រតិបត្តិការរវាងខេត្តសៀមរាប នឹងទីក្រុង Shingzhou ទាក់ទងការជំរុញវិស័យទេសចរណ៍ វប្បធម៌ កសិកម្ម ពាណិជ្ជកម្ម ឧស្សាហកម្ម និងការផ្លាស់ប្ដូរនិស្សិតកម្ពុជាពីខេត្តសៀមរាប ទៅកាន់ទីក្រុងសីងចូវនាពេលខាងមុខនេះ៕
អត្ថបទ និងរូបភាព៖ រដ្ឋបាលខេត្តសៀមរាប
