មន្ត្រីនៃមន្ទីរសុខាភិបាលខេត្តសៀមរាប បានបង្ហាញថា គិតត្រឹមរយៈពេល៥ខែ ឆ្នាំ២០២៥នេះ (២២សប្ដាហ៍) ករណីជំងឺគ្រុនឈាមកំពុងផ្ទុះឡើងគួរឱ្យបារម្ភ ខណៈដែលរដូវភ្លៀងបានមកដល់ នៅក្នុងខេត្តសៀមរាប មានអ្នកកំពុងសម្រាកព្យាបាលជំងឺនេះចំនួន ១ ០៥០ករណី ដែលករណីនេះមានស្ថានភាពធ្ងន់ជាងឆ្នាំ២០២៣ និងឆ្នាំ២០២៤ ប៉ុន្តែការផ្ទុះជំងឺមិនទាន់ដល់កម្រិតប្រកាសអាសន្ននៅឡើយ។
លោកវេជ្ជបណ្ឌិត សូរ សុទ្ធី ប្រធានការិយាល័យបង្ការ និងគ្រប់គ្រងជំងឺ នៃមន្ទីរសុខាភិបាលខេត្តសៀមរាប បានឱ្យដឹងនៅថ្ងៃទី០៣ ខែមិថុនានេះថា ចំពោះករណីខាងលើភាគច្រើនកើតឡើងលើកុមារ ដោយមនុស្សចាស់មានតែប្រមាណ៥ភាគរយ។ ករណីខាងលើនេះដែរកំពុងសម្រាកព្យាបាលតាមបណ្ដាមន្ទីរពេទ្យក្នុងខេត្តសៀមរាប ហើយអ្នកជំងឺទាំងនេះ មកពីខេត្តផ្សេងៗគ្នាដូចជា ខេត្តកំពង់ធំ បន្ទាយមានជ័យ បាត់ដំបង ខេត្តព្រះវិហារ ឧត្ដរមានជ័យ និងខេត្តសៀមរាបផ្ទាល់។ ករណីជំងឺគ្រុនឈាម ក៏បានបណ្ដាលឱ្យកុមារពីរនាក់បានស្លាប់ មកពីខេត្តបាត់ដំបង និងខេត្តកំពង់ធំ។
លោកវេជ្ជបណ្ឌិត សូរ សុទ្ធី បង្ហាញទៀតថា ទោះជាមានករណីកើតឡើងច្រើន មន្ត្រីជំនាញក៏កំពុងបន្តយកចិត្តទុកដាក់ខ្ពស់បំផុតក្នុងការអប់រំ ផ្សព្វផ្សាយដល់ប្រជាពលរដ្ឋ ដើម្បីបង្ការនឹងទប់ស្កាត់កុំឱ្យឆ្លងជំងឺគ្រុនឈាមនេះ ព្រមទាំងបានចុះបាញ់ថ្នាំនៅតាមភូមិដែលកំពុងកើតជំងឺគ្រុនឈាមច្រើន ផែនការត្រៀមថ្នាំអាបេតប្រមាណ១៥តោន ផ្ដល់ជូនប្រជាពលរដ្ឋ។ លោកវេជ្ជបណ្ឌិត ក៏បានណែនាំដល់ប្រជាពលរដ្ឋឱ្យសម្អាតបរិស្ថានជុំវិញផ្ទះឱ្យបានល្អ កុំឱ្យមានការដក់ទឹកនៅតាមសំបកកង់ឡាន ថ្លុក សំបកកំប៉ុង សំបកដូង ជាដើម ជាពិសេស ពាងទឹកត្រូវមានគម្រប ដាក់ថ្នាំអាបេត ឬចិញ្ចឹមត្រី៧ពណ៌ជាដើម៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
