នៅរសៀលថ្ងៃទី០៣ ខែមិថុនា ឆ្នាំ២០២៥ លោក លី សារី អភិបាលរងខេត្តសៀមរាប បានដឹកនាំអ្នកពាក់ព័ន្ធ បើកកិច្ចប្រជុំពិនិត្យពិភាក្សាជុំវិញបញ្ហាសុវត្ថិភាពចរាចរណ៍នៅតាមផ្លូវទៅអាកាសយានដ្ឋានអន្តរជាតិសៀមរាបអង្គរ រួមមានបញ្ហាភ្លើងសញ្ញាចរាចរណ៍ ស្លាកសញ្ញា គំនូសចរាចរណ៍ ដើម្បីពិនិត្យពិភាក្សាប្រមូលមតិយោបល់ធ្វើសំណើទៅក្រុមហ៊ុនសាងសង់ផ្លូវព្រលាន កែងសម្រួលឡើងវិញនូវចំណុចខ្វះខាតមួយចំនួន។
លោក លី សារី មានប្រសាសន៍ថា កន្លងមកករណីគ្រោះថ្នាក់ចរាចរណ៍លើផ្លូវទៅអាកាសយានដ្ឋានអន្តរជាតិសៀមរាបអង្គរ គឺកើតឡើងដោយសារកត្តាមួយចំនួន ដូចជា កត្តាមនុស្ស កត្តាផ្លូវថ្នល់ កត្តាបច្ចេកទេសយានយន្ត និងកត្តាអាកាសធាតុ។ សម្រាប់កិច្ចប្រជុំនាពេលនេះដែរ គឺជារឿងសំខាន់ក្នុងការប្រមូលបាននូវរាល់ធាតុចូលពីបញ្ហាទាំងអស់ ដើម្បីធ្វើការពិភាក្សាដោះស្រាយ ធ្វើយ៉ាងណាសម្រួលដល់ការធ្វើចរាចរណ៍តភ្ជាប់ចេញចូលទៅព្រលានយន្តហោះ កាន់តែមានសុវត្ថិភាព និងផ្ដល់ភាពងាយស្រួល។ ជាមួយនឹងការប្រមូលរាល់បញ្ហានានានេះដែរ ក្រុមការងារក៏នឹងចុះពិនិត្យទីតាំងផ្ទាល់ ដើម្បីធ្វើការពិនិត្យជាក់ស្ដែងផងដែរ៕
សូមជម្រាបថា ផ្លូវទៅកាន់អាកាសយានដ្ឋានអន្តរជាតិសៀមរាបអង្គរ ឬ Special Airport Highway តភ្ជាប់ពីផ្លូវជាតិលេខ៦ ទៅអាកាសយានដ្ឋានអន្តរជាតិសៀមរាបអង្គរ មានប្រវែងជាង ២៤គីឡូម៉ែត្រ សាងសងដោយក្រុមហ៊ុន Angkor International Airport Investment Co.,Ltd (AIAI) ដែលជាការវិនិយោគ BOT (សាងសង់ ដំណើរការ និងផ្ទេរមកវិញ) ក្នុងរយៈពេល ៥៥ឆ្នាំ៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
