ក្នុងឱកាសប្រគល់សារតាំង ព្រះករុណា ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជូនប្រធានាធិបតីសាធារណរដ្ឋប៊ុលហ្ការី នៅថ្ងៃទី០៣ ខែមិថុនា ឆ្នាំ២០២៥នេះ ឯកឧត្តមបណ្ឌិត ជា ច័ន្ទបរិបូរណ៍ ឯកអគ្គរាជទូតវិសាមញ្ញ និងពេញសមត្ថភាព នៃព្រះរាជាណាចក្រកម្ពុជា ប្រចាំសាធារណរដ្ឋប៊ុលហ្ការី បានប្ដេជ្ញាក្នុងការពង្រឹងទំនាក់ទំនងប្រទេសទាំងពីរ ឱ្យបានកាន់តែល្អប្រសើរបន្ថែមទៀត តាមរយៈពាណិជ្ជកម្ម វិនិយោគ ទេសចរណ៍ និងការផ្លាស់ប្ដូរវប្បធម៌។
ឯកឧត្តមបណ្ឌិត ជា ច័ន្ទបរិបូរណ៍ បានបញ្ជាក់ជូន ឯកឧត្តម ប្រធានាធិបតី ថា ភាពសម្បូរបែបនៃវប្បធម៌របស់កម្ពុជា គឺបានដើរតួជាទ្វារអាចជំរុញឱ្យប្រជាជនកម្ពុជា មកកាន់ប៊ុលហ្ការី និងប្រជាជនប៊ុលហ្ការី ទៅកាន់កម្ពុជា។ កម្ពុជា ដែលមានប្រវត្តិសាស្រ្តដ៏យូរលង់ និងមានវប្បធម៌ដ៏សម្បូរបែប ពិតជាមានបំណងចង់ចែករំលែករឿងរ៉ាវរបស់ខ្លួនជាមួយប្រជាជនប៊ុលហ្ការី។ ប៊ុលហ្ការី ក៏ជាប្រទេសដែលល្បីល្បាញលើសម្បត្តិវប្បធម៌ដ៏សម្បូរបែប វាពិតជាពិសេសដូចជាកម្ពុជាដែរ។
ឯកឧត្តម ឯកអគ្គរាជទូត បានបង្ហាញថា តាមរយៈការទូតប្រកបដោយប្រសិទ្ធភាព វានឹងក្លាយជាស្ពាននៃការទំនាក់ទំនង ការជឿទុកចិត្ត និងកិច្ចសហប្រតិបត្តិការ នឹងធ្វើឱ្យចំណងមិត្តភាពរវាងប្រទេសទាំងពីរ កាន់តែល្អប្រសើរឡើង។ កម្ពុជានៅតែបន្តរក្សាជំហរ ក្នុងការសហការរៀបចំ និងផ្សព្វផ្សាយពីវប្បធម៌ផ្សេងៗរបស់ប៊ុលហ្ការី ទៅកាន់កម្ពុជា ក្នុងន័យជំរុញរឹតចំណងមិត្តភាពបន្ថែម រវាងប្រជាជនប្រទេសទាំងពីរ កម្ពុជា-ប៊ុលហ្ការី ឱ្យបន្តរឹងមាំ ដើម្បីអនាគតរួម ដែលសម្បូរដោយសន្តិភាព ស្ថិរភាព និងការរីកចម្រើន។
ក្នុងឱកាសនោះ ឯកឧត្តម Rumen Radev បានបង្ហាញការពេញចិត្ត ចំពោះទំនាក់ទំនងមិត្តភាពជាប្រពៃណី និងកិច្ចសហប្រតិបត្តិការរវាងប្រទេសទាំង២ ជាងកន្លះសតវត្សកន្លងមក។ ហើយប៊ុលហ្ការី មាននូវបំណងពង្រឹងកិច្ចសន្ទនានយោបាយបន្ថែមទៀត និងការត្រៀមខ្លួនសម្រាប់កិច្ចសហប្រតិបត្តិការលើវិស័យដូចជា សេដ្ឋកិច្ច ពាណិជ្ជកម្ម ទេសចរណ៍ វប្បធម៌ និងការអប់រំ ជាមួយនឹងកម្ពុជា។
ឯកឧត្តម ប្រធានាធិបតី ក៏បានបង្ហាញការពេញចិត្ត ដែលព្រះមហាក្សត្រកម្ពុជា នៃព្រះរាជណាចក្រកម្ពុជា ក្នុងការតែងតាំង ឯកឧត្តមបណ្ឌិត ជា ច័ន្ទបរិបូរណ៍ ជាឯកអគ្គរាជទូត ដែលឯកឧត្តម ក៏ជាអតីតនិស្សិតរៀននៅទីនេះ ហើយបានស្គាល់យ៉ាងច្បាស់អំពីប្រវត្តិសាស្រ្ត ប្រជាជន វប្បធម៌ និងមានមិត្តភក្កិជាច្រើននៅទីនេះ។ ឯកឧត្តម ក៏បានផ្ដាំសួរសុខទុក្ខដល់អតីតនិស្សិតកម្ពុជា ដែលបាន និងធ្លាប់រៀននៅទីនេះ ហើយឯកឧត្តម ក៏មានបំណងទទួលនិស្សិតកម្ពុជា មករៀននៅទីនេះបន្ថែមទៀតផងដែរ៕
