ថ្លែងក្នុងទិវាអនាម័យបរិស្ថានជាតិ និងបរិស្ថានពិភពលោក ៥មិថុនា ក្រោមប្រធានបទ “ប្រយុទ្ធប្រឆាំងការបំពុលដោយប្លាស្ទិក” នៅខេត្តសៀមរាប នៅថ្ងៃទី០៥ ខែមិថុនា ឆ្នាំ២០២៥នេះ លោក យុន លីនណេ អភិបាលរងខេត្ត បានលើកឡើងថា ក្រុងសៀមរាប នឹងកាន់តែមានភាពស្រស់បំព្រង និងទាក់ទាញភ្ញៀវទេសចរបានកាន់តែច្រើន ប្រសិនបើប្រជាពលរដ្ឋទាំងអស់ ចូលរួមកែប្រែទម្លាប់នៃការវេចខ្ចប់ ទុកដាក់ ញែកសំរាម និងចោលសំរាមបានត្រឹមត្រូវ ដូចពាក្យស្លោក “យើងរួមកម្លាំងគ្នាដើម្បីបរិស្ថានក្រុងសៀមរាបស្អាត” ព្រមទាំងចូលរួមប្រយុទ្ធប្រឆាំងការបំពុលដោយប្លាស្ទិក កាត់បន្ថយថង់ប្លាស្ទិក កែច្នៃ ឬប្រើប្រាស់ឡើងវិញ។
លោក យុន លីនណេ បានបង្ហាញក្ដីជឿជាក់ថា ស្មារតីនៃទិវានេះ នឹងស្ថិតនៅជាប់ជានិរន្តរ៍ជាមួយប្រជាជនគ្រប់រូប និងសូមឱ្យសកម្មភាពទាំងអស់ពាក់ព័ន្ធនឹងបរិស្ថាន នឹងនៅជាមួយយើងទាំងអស់គ្នាជារៀងរាល់ថ្ងៃ តាមរយៈការចលនាកម្លាំងគ្រប់ស្រទាប់វណ្ណៈចូលរួមធ្វើការសម្អាតអនាម័យបរិស្ថានគ្រប់ទីកន្លែងទាំងអស់ក្នុងមូលដ្ឋានខ្លួន។
លោក យុន លីនណេ បន្តថា សម្រាប់ការរៀបចំទិវានាថ្ងៃនេះដែរ គឺដើម្បីជំរុញចលនាប្រជាពលរដ្ឋ និងសាធារណជនទូទៅ ចូលរួមឱ្យបានផុសផុលក្នុងកិច្ចគាំពារបរិស្ថាន ការគ្រប់គ្រងសំរាម ប្លាស្ទិក ដើម្បីរួមគ្នាការពារភពផែនដីយើងឱ្យមានភាពស្អាត បៃតង និងចីរភាព ជាឧត្តមប្រយោជន៍ដល់សង្គម និងមនុស្សជាតិគ្រប់ជំនាន់ និងដើម្បីអប់រំដល់បងប្អូនប្រជាពលរដ្ឋឱ្យបន្តស្រឡាញ់បរិស្ថាន ថែរក្សាបរិស្ថាន និងកាត់បន្ថយផលប៉ះពាល់នៃបរិស្ថានផងដែរ៕
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
