ក្នុងកិច្ចប្រជុំពិនិត្យវឌ្ឍនភាព និងជំរុញការអនុវត្តផែនការនៃការកែលម្អមណ្ឌលសុខភាព និងការងារជំរុញបង្កើនការថែទាំសុខភាពបឋម ខេត្តសៀមរាប នាថ្ងៃទី០ ៥ខែមិថុនានេះ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល បានជំរុញដល់គ្រប់មណ្ឌលសុខភាព ត្រូវបង្កើនការថែទាំសុខភាពបឋម និងកែលម្អគុណភាពនៃការផ្ដល់សេវានានាជូនប្រជាពលរដ្ឋឱ្យបានកាន់តែល្អប្រសើរឡើង ជាពិសេសអ្នកមានបណ្ណក្រីក្រ។
លោកជំទាវ ឱ វណ្ណឌីន បានលើកឡើងថា ការថែទាំសុខភាពបឋមនៅមូលដ្ឋានជូនប្រជាជនរបស់មណ្ឌលសុខភាព គឺជាកក្តាដ៏សំខាន់។ ប៉ុន្តែកន្លងមកការមកទទួលសេវាសុខាភិបាលរបស់ប្រជាពលរដ្ឋ នៅតាមមណ្ឌលសុខភាពមួយចំនួន ក្នុងខេត្តសៀមរាប ហាក់នៅមានកម្រិតទាប។ តែបន្ទាប់ពីអនុវត្តផែនការនៃការកែលម្អមណ្ឌលសុខភាព និងការងារជំរុញបង្កើនការថែទាំសុខភាពបឋម នៃគណៈកម្មការគ្រប់គ្រងមណ្ឌលសុខភាព និងមានការចុះពិនិត្យតាមដានជាប្រចាំរបស់មន្រ្តីទទួលបន្ទុក ឃើញថាអត្រាប្រជាពលរដ្ឋមកទទួលសេវាសុខាភិបាលនៅតាមមណ្ឌលសុខភាពនៅទូទាំងខេត្តសៀមរាប មានការកើនឡើងជាមុន។
លោកជំទាវ បានបង្ហាញថា កាលពីមុនក្នុង១ខែ មណ្ឌលសុខភាពខ្លះមានប្រជាពលរដ្ឋមកទទួលសេវាប្រមាណ ៥០០នាក់ប៉ុណ្ណោះ ប៉ុន្តែឥឡូវក្នុង១ខែ មានប្រមាណ៨០០ ទៅ៩០០នាក់ និងបានជួយដល់ប្រជាពលរដ្ឋជាច្រើន ដូចជាការជួយសង្គ្រោះប្រជាពលរដ្ឋបានទាន់ពេលវេលា កាត់បន្ថយការចំណាយរបស់ប្រជាពលរដ្ឋ ក្នុងការធ្វើដំណើរទៅកាន់មន្ទីរពេទ្យដែលនៅឆ្ងាយ។ ដូចនេះដើម្បីឱ្យក្លាយជាមណ្ឌលសុខភាពគំរូ គណៈកម្មការគ្រប់គ្រងមណ្ឌលសុខភាពទាំងអស់ គឺត្រូវពិនិត្យ និងពង្រឹងទៅលើការងារផ្ដល់សេវានៅមណ្ឌលសុខភាពនីមួយៗ សំដៅធ្វើឱ្យបានកាន់តែល្អប្រសើរឡើង នូវការពិនិត្យ និងព្យាបាលជំងឺជូនប្រជាពលរដ្ឋ។
លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប បង្ហាញថា វឌ្ឍនភាពលើការងារថែទាំសុខភាពបឋម ដែលបានអនុវត្តកន្លងមក ក្រុមការងារបានរៀបចំធ្វើផែនការសកម្មភាពអាទិភាព PHC-BIF សម្រាប់ឆ្នាំ២០២៥ រៀបចំមណ្ឌលសុខភាពចំនួន៣៩ ក្នុងដំណាក់កាលដំបូងជាមណ្ឌលសុខភាពផ្ដល់សេវាល្អ និងគំរូ។ ជាលទ្ធផល ក្រោមការតាមដាន និងវាយតម្លៃ យើងទទួលបានមណ្ឌលសុខភាពចំនួន២៣ ជាមណ្ឌលសុខភាពផ្ដល់សេវាល្អ និងមណ្ឌលសុខភាពចំនួន០២ ជាមណ្ឌលសុខភាពគំរូ គឺមណ្ឌលសុខភាពគោកចក និងមណ្ឌលសុខភាពចន្លាស់ដៃ។
លោក នាក់ ណេរ៉ុន អភិបាលរងខេត្ត បានស្នើដល់គ្រប់អ្នកពាក់ព័ន្ធ ត្រូវឈរលើស្មារតីយោគយល់ សាមគ្គីភាព និងនាំមកនូវគំនិតថ្មី ទស្សនៈថ្មីដ៏សមស្របសម្រាប់អនាគត ដែលជាការផ្ដួចផ្ដើម និងសម្របសម្រួល សំដៅលើកកម្ពស់សមត្ថភាព និងគុណភាពនៃប្រព័ន្ធសុខាភិបាលទំនើប ធ្វើយ៉ាងណាឲ្យការអនុវត្តន៍យុទ្ធសាស្ត្រ កម្មវិធីសុខាភិបាល នៅគ្រប់មូលដ្ឋានទទួលបានជោគជ័យ ដើម្បីជាឧត្តមប្រយោជន៍ជូនប្រជាពលរដ្ឋ ពិសេសប្រជាជននៅតំបន់ដាច់ស្រយាល ដោយសហការណ៍យ៉ាងជិតស្និតជាមួយក្រុមទ្រទ្រង់សុខភាពភូមិ ក្នុងការផ្ដល់ព័ត៌មានឲ្យគ្នាទៅវិញទៅមក ស្ដីពីស្ថានភាពសុខភាពរបស់ប្រជាពលរដ្ឋ ដែលស្ថិតនៅក្នុងតំបន់គ្របដណ្ដប់របស់ខ្លួន៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
