នៅថ្ងៃទី០៨ ខែមិថុនា ឆ្នាំ២០២៥នេះ កម្ពុជា-កូរ៉េ បានសហការរៀបចំកម្មវិធីវប្បធម៌កូរ៉េ K-POP World Festival ២០២៥ លើកទី៦ ដើម្បីលើកស្ទួយទំនាក់ទំនង និងបង្កើនមិត្តភាពកម្ពុជា-កូរ៉េ នៅផ្សារហេរីថេកវ៉ក ក្រុងសៀមរាប ដោយពិធីនេះក៏មានការចូលរួមពី លោក យុន លីនណេ អភិបាលរងខេត្តសៀមរាប។
សម្រាប់កម្មវិធីនេះដែរ រៀបចំឡើងក្នុងន័យ ដើម្បីផ្សព្វផ្សាយ អភិវឌ្ឍន៍វប្បធម៌ និងពង្រឹងពង្រីកកិច្ចសហប្រតិបត្តិការប្រទេសទាំងពីរ តាមច្រកទ្វារវិស័យវប្បធម៌ និងសិល្បៈ សម្រាប់ប្រទេស និងប្រជាជន កម្ពុជា-កូរ៉េ។
លោក យុន លីនណេ បង្ហាញថា កម្មវិធីនេះជាការឆ្លុះបញ្ចាំងអំពីលើកកម្ពស់ ការអភិវឌ្ឍវប្បធម៌សិល្បៈ និងការលើកស្ទួយទំនាក់ទំនង មិត្តភាពកម្ពុជា-កូរ៉េ និងពិតជាមានសារៈសំខាន់ សម្រាប់យើងក្នុងការវាយតម្លៃវឌ្ឍនភាព នៃទំនាក់ទំនងសហប្រតិបត្តិការ សាមគ្គីភាព កាលានុវត្តភាព រវាងប្រទេស និងប្រជាជនកម្ពុជា-កូរ៉េ៕
អត្ថបទ និងរូបភាព៖ រដ្ឋបាលខេត្តសៀមរាប
