ឯកឧត្ដម ហ៊ុល សីលា អនុរដ្ឋលេខាធិការក្រសួងទេសចរណ៍ លើកឡើងថាការប្រើប្រាស់បណ្ដាញសង្គម ការបង្កើតមាតិកាទេសចរណ៍ឌីជីថល បានដើរតួនាទីយ៉ាងសំខាន់ក្នុងការផ្សព្វផ្សាយសក្ដានុពលទេសចរណ៍កម្ពុជា និងទាក់ទាញទេសចរណ៍ឱ្យមកទស្សនា និងអ្នកវិនិយោគក្នុងវិស័យទេសចរណ៍ ឱ្យបានកាន់តែច្រើនបន្ថែមទៀតមកកម្ពុជា ខណៈរាជរដ្ឋាភិបាលកម្ពុជាកំពុងដាក់ចេញនូវសកម្មភាពក្នុងគោលដៅទាក់ទាញភ្ញៀវទេសចរ។
ការលើកឡើងបែបនេះរបស់ឯកឧត្ដម ហ៊ុល សីលា បានធ្វើឡើងថ្ងៃទី១០ ខែមិថុនា ឆ្នាំ២០២៥នេះ ក្នុងឱកាសដែលឯកឧត្ដម ថ្លែងបើកសិក្ខាសាលា ស្តីពីការបង្កើតមាតិកាទេសចរណ៍ឌីជីថល (Tourism Digital Content) និងបច្ចេកទេសថតរូបដោយប្រើទូរសព្ទដៃ ជូនដល់មគ្គុទ្ទេសក៍ទេសចរណ៍ជាង១០០នាក់ នៅក្នុងខេត្តសៀមរាប។
ព័ត៌មានជាតិ ថ្មីៗ
ឯកឧត្ដម បានគូសបញ្ជាក់ថាសិក្ខាសាលា រយះពេល២ថ្ងៃនេះមិនត្រឹមតែជួយលើកកម្ពស់ ដល់វិស័យទេសចរណ៍កម្ពុជាប៉ុណ្ណោះទេ ព្រមទាំងបង្កើនចំណេះដឹង ដល់សិក្ខាកាមឱ្យដឹងកាន់តែច្បាស់អំពីការប្រើប្រាស់បណ្ដាញសង្គម ការបង្កើតមាតិកាទេសចរណ៍ឌីជីថល និងបច្ចេកទេសថតរូបដោយប្រើទូរសព្ទដៃ ឱ្យបានកាន់តែច្បាស់លាស់ជូនដល់មគ្គុទ្ទេសក៍ទេសចរណ៍។
ឯកឧត្ដមលើកទឹកចិត្ត និងគាំទ្រដល់សកម្មភាពផ្សព្វផ្សាយព័ត៌មានវិជ្ជមាន និងស្នើសុំយោគយល់មិនផ្សព្វផ្សាយព័ត៌មានអវិជ្ជមាន ដែលនាំឱ្យប៉ះពាល់ ដល់ទេសចរណ៍ជាតិយើង ដើម្បីរួមគ្នាប្រែក្លាយទេសចរណ៍កម្ពុជា ជាទេសចរវ៉ៃឆ្លាត បៃតង ស្អាត ចីរភាព បរិយាប័ន្ន និងភាពធន និងរួមគ្នាបន្តត្រូវអនុវត្តន៍យុទ្ធនាការ «រដូវកាលបៃតង (Green Season)» ដើម្បីទាក់ទាញភ្ញៀវទេសចរជាតិ និងអន្តរជាតិ ។
អត្ថបទ និងរូបភាព៖ លោក ធន់ ពូថេ
កែសម្រួល៖ លោក ហាំ ម៉េងហួត
