ប្រធានមន្ទីរពេទ្យបង្អែក ប៊ុនរ៉ានី ហ៊ុនសែន រុនតាឯក លោក ថោង បញ្ញាវ័ន្ត បានបង្ហាញថា ចក្ខុវិស័យរបស់មន្ទីរពេទ្យទៅថ្ងៃអនាគត ធ្វើយ៉ាងណាត្រូវផ្ដល់សេវាមួយប្រកបដោយគុណភាព ប្រសិទ្ធភាព និងភាពជឿជាក់ ជូនដល់ប្រជាពលរដ្ឋនៅក្នុងតំបន់ ក៏ដូចជានៅក្រៅតំបន់ ជាពិសេសមន្ទីរពេទ្យមានគោលដៅខ្ពស់ក្នុងការផ្ដល់សេវាដោយស្មើភាពគ្នាជូនប្រជាពលរដ្ឋទូទៅ ហើយមន្ទីរពេទ្យនេះនឹងត្រៀមប្រែងក្លាយជាមន្ទីរពេទ្យបង្អែកកម្រិត២ នាពេលខាងមុខ។
ថ្លែងប្រាប់ទូរទស្សន៍ជាតិខេត្តសៀមរាប លោក ថោង បញ្ញាវ័ន្ត ឱ្យដឹងថា បច្ចុប្បន្នមន្ទីរកំពុងមានឧបករណ៍ទំនើបៗមួយចំនួនសម្រាប់ប្រើប្រាស់ ជាមួយនឹងក្រុមគ្រូពេទ្យឯកទេសដែលមានបទពិសោធន៍ច្រើនឆ្នាំ បានចូលរួមក្នុងការផ្ដល់សេវាជូនប្រជាពលរដ្ឋ។ ជាមួយនោះក្រុមគ្រូពេទ្យលោក គឺបានប្រកាន់ភ្ជាប់នូវគោលការណ៍រួម ដោយផ្ដល់សេវាព្យាបាល និងពិគ្រោះជំងឺជូនបងប្អូនប្រជាពលរដ្ឋដោយស្មើភាពគ្នា មិនថាបង់ថ្លៃ ឬប្រើបណ្ណសមធម៌។
លោកប្រធានមន្ទីរពេទ្យ ក៏បានឱ្យដឹងថា បច្ចុប្បន្នមន្ទីរពេទ្យមានផ្ដល់សេវាដូចជា ផ្នែកពិគ្រោះជំងឺទូទៅ មនុស្សធំ និងកុមារ, សង្រ្គោះបន្ទាន់, ផ្នែកសម្រាកជំងឺទូទៅ, វះកាត់តូច និងរបួស, សម្ភព និងរោគស្រ្ដី, ផ្នែកវេជ្ជសាស្ដ្រ មន្ទីរពិសោធន៍ និងអគ្គិសនីបេះដូង, ឱសថស្ថាន, ផ្ដល់ថ្នាំបង្ការដល់ស្រ្ដី និងកុមារ, ផ្នែកព្យាបាលមាត់ធ្មេញ និងផ្នែកជំងឺឆ្លង និងមិនឆ្លង ដោយក្នុងមួយថ្ងៃមានអ្នកមកទទួលសេវាប្រមាណ១៥០ ទៅ២០០នាក់៕
ព័ត៌មានជាតិ ថ្មីៗ
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
