នៅថ្ងៃទី១១ ខែមិថុនា ឆ្នាំ២០២៥នេះ មន្ទីរពេទ្យគន្ធបុប្ផាខេត្តសៀមរាប បានទទួលអំណោយជាថវិកាចំនួន ១០លានរៀល ពីមន្ទីរព្យាបាលធ្មេញ ជា លាងហេង សម្រាប់យកមកប្រើប្រាស់គាំទ្រដល់កិច្ចដំណើរការរបស់មន្ទីរពេទ្យ លើការពិនិត្យ និងព្យាបាលទារក និងកុមារកម្ពុជា ដោយឥតគិតថ្លៃ ប្រកបដោយគុណភាព ប្រសិទ្ធភាព និងមិនមានការរើសអើង។
អ្នកស្រី ទូច សុខផៃ អគ្គនាយិកា មន្ទីរព្យាបាលធ្មេញ ជា លាងហេង ខេត្តសៀមរាប បានឱ្យដឹងថា ថវិកាខាងលើបានមកពីការចូលរួមរបស់គណៈគ្រងគ្រប់ បុគ្គលិកនៃមន្ទីរព្យាបាលធ្មេញខេត្តសៀមរាប និងខេត្តបាត់ដំបង ដើម្បីចូលរួមគាំទ្រដល់កិច្ចដំណើរការរបស់មន្ទីរពេទ្យ ក្នុងគោលបំណងរួមមួយ គឺនាំក្ដីសង្ឃឹម និងភាពញញឹមដល់ទារក និងកុមារកម្ពុជា រួមនឹងស្ត្រីមានផ្ទៃពោះ នៅពេលដែលត្រូវការសេវាពិនិត្យ និងព្យាបាល ជាពិសេសបងប្អូនដែលមកពីគ្រួសារក្រីក្រ និងងាយរងគ្រោះ អាចទទួលបានការពិនិត្យ និងព្យាបាលជំងឺដោយឥតគិតថ្លៃប្រកបដោយគុណភាព។
គួរជម្រាបថា មន្ទីរពេទ្យគន្ធបុប្ផា ជាមន្ទីរពេទ្យកុមារថ្នាក់ជាតិ ដែលទទួលការពិនិត្យ និងព្យាបាលកុមាររាប់លានករណីក្នុងមួយឆ្នាំៗ ដោយមិនគិតថ្លៃ។ មន្ទីរពេទ្យនេះ អាចដំណើរការទៅបានរហូតដល់ពេលនេះ និងទៅអនាគត គឺអាស្រ័យលើការចូលរួមបរិច្ចាគ និងវិភាគទានដែលមិនអាចខ្វះបានពីប្រភពស្របច្បាប់នានា រួមមានរាជរដ្ឋាភិបាលកម្ពុជា ក្រសួងស្ថាប័ន ក្រុមហ៊ុនឯកជន និងសប្បុរសជនទាំងក្នុង និងក្រៅប្រទេស៕
ព័ត៌មានជាតិ ថ្មីៗ
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
