ថ្លែងក្នុងពិធីផ្សព្វផ្សាយ ស្តីពីការកំណត់លក្ខខណ្ឌនៃការប្រើប្រាស់ដី និងការគ្រប់គ្រងនគរូបនីយកម្ម និងសំណង់ ក្នុងតំបន់រមណីយដ្ឋានអង្គរ នៅរសៀលថ្ងៃទី០៩ ខែមិថុនា ឆ្នាំ២០២៥នេះ ឯកឧត្ដម ឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំ ដែនដី នគរូបនីយកម្ម និងសំណង់ បានជំរុញដល់អាជ្ញាធរពាក់ព័ន្ធក្នុងខេត្តសៀមរាប ត្រូវរៀបចំលក្ខខណ្ឌនៃការប្រើប្រាស់ដីនៅតំបន់រមណីយដ្ឋានអង្គរឱ្យកាន់តែមានភាពល្អប្រសើរ ដោយការកំណត់លក្ខខណ្ឌនៃការប្រើប្រាស់ដី និងការគ្រប់គ្រងនគរូបនីយកម្ម និងសំណង់ក្នុងតំបន់រមណីយដ្ឋានបេតិកភណ្ឌពិភព គឺសំដៅស្វែងរកការឯកភាពគ្នា ការពារនិងអភិរក្ស ដើម្បីទាក់ទាញភ្ញៀវទេសចរ។
ឯកឧត្ដម ឧបនាយករដ្ឋមន្ត្រី សាយ សំអាល់ លើកឡើងថា ការងារនេះ គឺសំដៅស្វែងរកការឯកភាពគ្នា ការពារឧត្ដមប្រយោជន៍ នៃការអភិរក្ស និងលើកស្ទួយជីវភាពរបស់អ្នកស្រុកអង្គរ បង្កលក្ខណៈឱ្យភ្ញៀវទេសចរមកទស្សនាកម្សាន្ត និងបង្កើនឱកាសសេដ្ឋកិច្ចសម្រាប់កម្ពុជា ពិសេសខេត្តសៀមរាបផ្ទាល់។ ភ្ញៀវទេសចរដែលមកកម្សាន្តនៅកម្ពុជាភាគច្រើន គឺចង់មកទស្សនាប្រាសាទអង្គរវត្ត ដែលអាជ្ញាធរពាក់ព័ន្ធ ត្រូវគិតគូរការកំណត់លក្ខខណ្ឌនៃការប្រើប្រាស់ដី នៅក្នុងតំបន់រមណីយដ្ឋានអង្គរ បែបណាឱ្យលំនៅឋានរបស់ប្រជាពលរដ្ឋមានភាពស្អាត មានរបៀបមានសណ្ដាប់ធ្នាប់ កន្លែងលក់ដូររបស់ពួកគាត់ស្អាត និងមានអនាម័យប្រកបដោយផាសុកភាព ដែលជាទាញអារម្មណ៍ភ្ញៀវទេសចរមកដល់មានភាពស្រស់ស្រាយ ដែលធ្វើឱ្យភ្ញៀវទេសចរឱ្យមកកាន់តែច្រើនជារៀងរាល់ឆ្នាំ។
ឯកឧត្ដម ក៏បានឱ្យដឹងថា ការរៀបចំកំណត់លក្ខខណ្ឌនៃការប្រើប្រាស់ដីនៅខេត្តសៀមរាប ក៏ដើម្បីធ្វើជាគំរូ សម្រាប់យកទៅអនុវត្តបន្ត នៅខេត្តព្រះវិហារផងដែរ។ នេះជាជំហានថ្មីមួយទៀត របស់ក្រសួងរៀបចំដែនដី ក្រសួងវប្បធម៌ ក្រុមការងាររាជរដ្ឋាភិបាលចុះមូលដ្ឋានខេត្ត និងស្ថាប័នពាក់ព័ន្ធ ក្នុងការស្វែងរកការឯកភាពគ្នាលើការកំណត់លក្ខខណ្ឌក្នុងតំបន់រមណីយដ្ឋានអង្គរ ដោយធ្វើការពិនិត្យឡើងវិញនូវរបៀបរបបការងារ លិខិតបទដ្ឋានគតិយុត្ត របៀបរបបរស់នៅរបស់ពលរដ្ឋក្នុងតំបន់ការពារបេតិកភណ្ឌ ឱ្យមានការយល់គ្នាកាន់តែច្រើនជាងមុនរវាងប្រជាពលរដ្ឋ និងអាជ្ញាធរពាក់ព័ន្ធ ស្របទៅតាមកិច្ចការបេតិកភណ្ឌ និងជាមួយអន្ដរជាតិ ក្នុងស្មារតីការពារនិងអភិរក្សមរតកដូនតា និងលើកស្ទួយជីវភាពអ្នកស្រុកអង្គរ ឱ្យស្របទៅតាមប្រសាសន៍សម្តេចធិបតី លើការរៀបចំផ្ទះសំបែងឱ្យរៀបរយ និងពង្រឹងខឿនសេដ្ឋកិច្ចជាតិ៕
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
