នៅព្រឹកថ្ងៃទី១០ ខែមិថុនា ឆ្នាំ២០២៥ ឯកសារវិនិច្ឆ័យការចុះបញ្ជីដីធ្លីមានលក្ខណៈជាប្រព័ន្ធចំនួន៥៣៤០ក្បាលដី ក្នុងភូមិចំនួន៧ មានភូមិល្ហុង ភូមិគោកត្រុំ ភូមិរំដេង ភូមិគំរូ ភូមិគោកចាស់ ភូមិផ្លាំង និងភូមិគោកត្នោត ក្នុងឃុំស្រណាល ស្រុកក្រឡាញ់ ខេត្តសៀមរាប ត្រូវបានមន្ទីរជំនាញសហការជាមួយអាជ្ញាធរមូលដ្ឋាន បិទផ្សាយជាសាធារណៈ ដើម្បីឱ្យប្រជាពលរដ្ឋ និងអ្នកកាន់កាប់ ឬម្ចាស់ក្បាលដី ធ្វើការពិនិត្យ ផ្ទៀងផ្ទាត់មុននឹងឈានទទួលបានប័ណ្ណកម្មសិទ្ឋសម្គាល់ម្ចាស់អចលនទ្រព្យ ដែលពិធីនេះធ្វើឡើងក្នុងវត្តបូទុម្មរតនញ្ញាណ ហៅវត្តស្រណាល ស្ថិតក្នុងឃុំស្រណាល ស្រុកក្រឡាញ់ ខេត្តសៀមរាប។
លោក ហេង គឹមចុង អភិបាលរងស្រុកក្រឡាញ់បានមានប្រសាសន៍ថា ការចុះបញ្ជីដីមានលក្ខណៈជាប្រព័ន្ធនេះ គឺធ្វើឡើងដើម្បីផ្តល់ប័ណ្ណកម្មសិទ្ធិ ជូនដល់បងប្អូនប្រជាពលរដ្ឋ ដែលជាម្ចាស់ដី ឬអ្នកកាន់កាប់ដីទាំងអស់សម្រាប់យកទៅប្រើប្រាស់ តាមតម្រូវការរបស់បងប្អូនប្រជាពលរដ្ឋ និងជាឯកសារសំអាងសម្គាល់ម្នាស់កម្មសិទ្ធិដីធ្លី។ ហេតុនេះសូមម្ចាស់ក្បាលដី ឬតំណាំងអង្គភាពដែលពាក់ព័ន្ធជាម្ចាស់ដី ឬនិងអ្នកកាន់កាប់ដីទាំងអស់ក្នុងឃុំស្រណាល សូមមកពិនិត្យផ្ទៀងផ្ទាត់ឱ្យបានគ្រប់ៗគ្នា ក្នុងអំឡុងពេលការបិទផ្សាយនេះ ហើយប្រសិនបើពិនិត្យទៅឃើញថាមានកំហុសឆ្គង ម្ចាស់ដី ឬអ្នកកាន់កាប់ដីអាចធ្វើការកែតម្រូវ ដាក់ពាក្យបណ្តឹងជំទាស់តវ៉ា មកគណៈកម្មការរដ្ឋបាលបាន ។
ជាមួយគ្នានេះដែរ លោក ប៊ូ ជុំសម្បត្តិ អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប មានប្រសាសន៍ថា ការរៀបចំបិទផ្សាយជាសាធារណៈនូវឯកសារនៃការវិនិច្ឆ័យ គឺសម្រាប់បងប្អូនប្រជាពលរដ្ឋទាំងអស់ជាម្ចាស់ដី ឬអ្នកពាក់ព័ន្ធ ដើម្បីមកពិនិត្យផ្ទៀងផ្ទាត់មើលទៅលើ ទីតាំងដី និងរូបរាងដី នៅលើប្លង់សុរិយោដី និងត្រូវពិនិត្យមើល ឈ្មោះ សាវតា ទំហំដី និងប្រភេទទ្រព្យ នៅក្នុងបញ្ជីឈ្មោះម្ចាស់ដី ព្រោះនេះគឺជាឱកាសចុងក្រោយសំរាប់ម្ចាស់ដី ឬអ្នកពាក់ព័ន្ធទាំងអស់មានសិទ្ធិធ្វើការកែតម្រូវ ឬជំទាស់តវ៉ាបាន ក្នុងករណីដែលពិនិត្យឃើញថាមានកំហុសឆ្គង
សូមបញ្ជាក់ដែរថា ការបិទផ្សាយជាសាធារណៈមានរយៈ១៥ ថ្ងែ ដោយគិតចាប់ពីថ្ងៃទី១០ ដល់ថ្ងៃទី២៤ ខែមិថុនា ឆ្នាំ២០២៥ ដោយគិតរួមទាំងថ្ងៃបុណ្យ និងថ្ងៃឈប់សំរាក ដែលមានទីតាំងស្ថិតក្នុងវត្តបូទុម្មរតនញ្ញាណនៃឃុំស្រណាល។
រាល់ចំងល់ផ្សេងៗ ឬក្នុងករណីដែលបងប្អូនមិនចេះអក្សរឬមើលមិនយល់ មន្ត្រីដែលនៅប្រចាំការនឹងធ្វើការពន្យល់ បកស្រាយ រាល់ការមន្ទិលសង្ស័យ ឬចំងល់ផ្សេងៗ និងទទួលនូវពាក្យបណ្តឹងតវ៉ា ហើយធ្វើការសម្របសម្រួលតាមការព្រមព្រៀងដោយគណៈកម្មការរដ្ឋបាល។
អត្ថបទ និងរូបភាព៖ លោក យូ វង្ស
កែសម្រួល៖ លោក ហាំ ម៉េងហួត
