ក្នុងសន្និសីទសារព័ត៌មានរបស់សមាគមចុងភៅកម្ពុជា ខេត្តសៀមរាប នាព្រឹកថ្ងៃទី០៦ ខែមិថុនា ឆ្នាំ២០២៥នេះ លោកស្រី ប៉ុល គឹមសាន ប្រធានសមាគមចុងភៅកម្ពុជា បានបង្ហាញថា ការចូលរួមប្រកួតចម្អិនម្ហូបលំដាប់អន្តរជាតិនៅប្រទេសថៃ ដែលកម្ពុជាទទួលបានមេដៃចំនួន ២១គ្រឿង គឺជាសមិទ្ធផលដ៏គួរឱ្យកោតស្ញប់ស្ញែង និងជាទីមោទកភាពសម្រាប់ប្រទេសកម្ពុជា នៅលើឆាកអន្តរជាតិ។
លោកស្រី ប៉ុល គឹមសាន បានឱ្យដឹងថា កម្មវិធីប្រកួតចម្អិនម្ហូបដ៏ធំប្រចាំឆ្នាំ Thailand Ultimate Chef Challenge 2025 (TUCC) កាលពីថ្ងៃទី២៧-៣១ ខែឧសភា ឆ្នាំ២០២៥ គឺជាការប្រកួតលំដាប់អន្តរជាតិ ដែលរៀបចំឡើងដោយសមាគមចុងភៅថៃ និងសមាគមចុងភៅពិភពលោក (WAC) ដោយមានបេក្ខភាពចូលរួមប្រកួតប្រមាណជាង ៥០០នាក់ មកពីប្រទេសចំនួន៩ រួមមានប្រទេសកម្ពុជា ថៃ វៀតណាម ម៉ាឡេស៊ី ឥណ្ឌូនេស៊ី ហ្វីលីពីន ចិនតៃវ៉ាន់ កូរ៉េខាងត្បូង និងប្រទេសប៉ាគីស្ថាន។
ព័ត៌មានជាតិ ថ្មីៗ
លោកស្រី ឱ្យដឹងទៀតថា សម្រាប់មេដៃចំនួន២១គ្រឿងនេះ មានមេដាយមាស៦គ្រឿង មេដាយប្រាក់៧គ្រឿង និងមេដាយសំរឹទ្ធចំនួន៨គ្រឿង ព្រមទាំងបានពានរង្វាន់ធំចំនួន១ (Best Ultimate Asian Gourmet Challenge) ជាមួយនឹងប្រាក់រង្វាន់ ២ម៉ឺនបាត។ ជាមួយនឹងការចូលរួមប្រកួតនេះ សមាគមចុងភៅរំពឹងថា នេះជាផ្នែកមួយក្នុងការផ្សព្វផ្សាយមុខម្ហូបរបស់កម្ពុជា ទៅកាន់ពិភពលោកផងដែរ៕
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
