ថ្លែងក្នុងកិច្ចប្រជុំថ្នាក់តំបន់លើកទី១ របស់សមាគមអ្នកផ្គត់ផ្គង់ទឹកស្អាតកម្ពុជា នាថ្ងៃទី០៦ ខែមិថុនា ឆ្នាំ២០២៥នេះ លោក អុឹង គឹមលាង អភិបាលរងខេត្ត បានណែនាំដល់ប្រតិបត្តិករផ្គត់ផ្គង់ទឹកស្អាតឯកជន ត្រូវបង្កើនកិច្ចសហការប្រតិបត្តិការជាមួយគ្រប់អ្នកពាក់ព័ន្ធ ការក្នុងពង្រឹងគុណភាពនៃការផ្ដល់សេវាទឹកស្អាតឱ្យស្របតាមស្ដង់ដារកំណត់ជូនប្រជាពលរដ្ឋ ពិសេសការធ្វើតេស្តគុណភាពទឹកប្រចាំថ្ងៃ និង ៣ខែម្ដង ហើយត្រូវរក្សាទុកឯកសារលទ្ធផលធ្វើតេស្តឱ្យបានល្អ។
លោក អ៊ឹង គឹមលាង មានប្រសាសន៍ថា កិច្ចប្រជុំនាពេលនេះ ជាផ្នែកមួយដែលនឹងជួយជំរុញដល់កំណើននៃការផ្គត់ផ្គង់ទឹកស្អាតជូនប្រជាពលរដ្ឋ ប្រកបដោយគុណភាព សុវត្ថិភាព និរន្តរភាព និងថ្លៃសមរម្យ តាមការកំណត់របស់ក្រសួងឧស្សាហកម្ម និងការសម្រេចបាននូវគោលដៅអភិវឌ្ឍន៍ប្រកបដោយចីរភាពកម្ពុជា ឆ្នាំ២០១៦-២០៣០ ដែលកំណត់ថា “ប្រជាពលរដ្ឋទូទាំងប្រទេសនឹងមានទឹកស្អាតប្រើ នៅត្រឹមឆ្នាំ២០៣០”។ ដើម្បីឱ្យកិច្ចប្រជុំនេះទទួលបានជោគជ័យទៅតាមការគ្រោងទុក ស្នើសុំឱ្យអ្នកចូលរួមទាំងអស់ សកម្មក្នុងការចែករំលែកនូវចំណេះដឹង បទពិសោធន៍ ជំនាញ និងសួរដេញដោលប្រកបដោយការស្ថាបនា ដើម្បីបានជាប្រយោជន៍សម្រាប់ការផ្គត់ផ្គង់ទឹកស្អាតគ្រប់បណ្ដាខេត្ត។
លោក ឡេង ខៀវ ប្រធានសមាគមអ្នកផ្គត់ផ្គង់ទឹកស្អាតកម្ពុជា បានបង្ហាញថា វិស័យឯកជនពិតជាដើរតួយ៉ាងសំខាន់ជួយដល់រាជរដ្ឋាភិបាលកម្ពុជាក្នុងការផ្គត់ផ្គង់ទឹកស្អាតជូនប្រជាពលរដ្ឋ ហើយបើតាមរបាយការណ៍របស់ក្រសួងឧស្សាហកម្ម គិតត្រឹមខែមេសា ឆ្នាំ២០២៥ ៤១.៩ភាគរយ នៃចំនួនខ្នងផ្ទះក្នុងប្រទេសកម្ពុជា ដែលទទួលបានទឹកស្អាតតាមបំពង់ប្រើប្រាស់ ដោយក្នុងនោះឯកជនផ្គត់ផ្គង់បាន ៥៦ភាគរយ។ ប៉ុន្តែការទទួលបានទឹកស្អាតតាមបំពង់សម្រាប់ប្រើប្រាស់ គឺនៅមានកម្រិតទាប ដែលតម្រូវឱ្យមានការពន្លឿនលើវិស័យទឹកស្អាតជាចាំបាច់ ដើម្បីឆ្លើយតបទៅនឹងតម្រូវរបស់ប្រជាពលរដ្ឋ។
លោក ឡេង ខៀវ បានឱ្យដឹងថា ការដែលយើងនៅមានកម្រិតទាបនេះដែរ ដោយសារតាមការចុះទៅពិនិត្យជាក់ស្ដែង ឃើញថាប្រតិបត្តិករពិតជាជួបទៅនឹងបញ្ហាប្រឈមចម្បងៗដូចជា ការខូចខាតបំពង់ទឹកស្អាតដោយសារការជួសជុលនិងសាងសង់ផ្លូវថ្នល់ និងសកម្មភាពមួយចំនួនរបស់ប្រជាពលរដ្ឋដោយមិនមានសំណង កង្វះប្រភពទឹក ការគាំទ្ររបស់អាជ្ញាធរមូលដ្ឋាន និងការយល់ដឹងពីទឹកស្អាតនៅមានកម្រិត កង្វះទុនវិយោគជាដើម៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
