ករណីវិជ្ជមានជំងឺកូវីដ-១៩ ត្រូវបានក្រសួងសុខាភិបាលប្រកាសពីការរកឃើញថ្មីជារៀងរាល់ថ្ងៃ ដែលជាករណីក្នុងសហគមន៍ ដែលប្រកាសនេះ មន្ត្រីសុខាភិបាលខេត្ដសៀមរាប សូមអំពាវដល់ប្រជាពលរដ្ឋដែលមានអាយុចាប់ពី១២ឆ្នាំឡើង សូមទៅទទួលយកការវ៉ាក់សាំងបង្ការជំងឺកូវីដ-១៩ ឱ្យបានគ្រប់ៗគ្នា ចាប់ពីដូសទី១ ពិសេសដូសជំរុញ។
លោក ដៀប សុបូរី មន្ត្រីទទួលបន្ទុកគ្រប់គ្រង និងផ្ដល់ថ្នាំបង្ការ នៃមន្ទីរសុខាភិបាលខេត្តសៀមរាប បានបង្ហាញថា កាលពីថ្ងៃទី១២ ខែឧសភា ឆ្នាំ២០២៥កន្លងទៅ រាជរដ្ឋាភិបាលកម្ពុជាបានប្រកាសឡើងវិញ ឱ្យប្រជាពលរដ្ឋទៅទទួលយកការចាក់វ៉ាក់សាំងការពារជំងឺកូវីដ-១៩ ខណៈនៅក្នុងប្រទេសកម្ពុជា ត្រូវបានរកឃើញជាបន្តបន្ទាប់។ លោកថា បច្ចុប្បន្នមានប្រជាពលរដ្ឋប្រជាពលរដ្ឋតិចតួចប៉ុណ្ណោះដែលមកទទួលវ៉ាក់សាំង ទាំងដូសទីមួយ និងដូសជំរុញ បើទោះបីមានការប្រកាសឱ្យប្រជាពលរដ្ឋទៅទទួលវ៉ាក់សាំងក្ដី។
លោកសូមអំពាវដល់ប្រជាពលរដ្ឋចាប់ពីអាយុ១២ឆ្នាំឡើង សូមទៅទទួលយកការវ៉ាក់សាំងដោយមិនគិតថ្លៃឱ្យបានគ្រប់ៗគ្នា ទាំងដូសទី១ និងដូសជំរុញ នៅតាមមន្ទីរពេទ្យ និងមណ្ឌលសុខភាពដែលមៅជិតបងប្អូនបំផុត។
យោងតាមរបាយការណ៍ អនុគណកម្មការចំពោះកិច្ចចាក់វ៉ាក់សាំងកូវីដ-១៩ ខេត្ដសៀមរាប ចាប់ពីថ្ងៃទី០១ ខែមីនា ឆ្នាំ២០២១ ដល់ថ្ងៃទី៣១ ខែឧសភា ឆ្នាំ២០២៥នេះ ការផ្ដល់វ៉ាក់សាំងដូសទី១ មានចំនួន ៩៩៤ ៧៥៧នាក់, ដូសទី២ មានចំនួន ៨៦៩ ២៤០នាក់, ដូសជំរុញទី៣ មានចំនួន ១៩៣ ២៣០នាក់, ដូសជំរុញទី៤ មានចំនួន ១៨៨ ៩០៤នាក់, ដូសជំរុញទី៥ មានចំនួន ៦៩ ៧៤០នាក់, ដូសជំរុញទី៦ មានចំនួន ១៥ ១៤៤នាក់ និងដូសទី៧ មានចំនួន ២៧៦នាក់៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
