នៅថ្ងៃទី០១ ខែមិថុនា ឆ្នាំ២០២៥នេះ បងប្អូនប្រជាពលរដ្ឋមានជីវភាពខ្វះខាត និងជនចាស់ជរា ចំនួន៥០គ្រួសារ រស់នៅក្នុងភូមិពាន ភូមិតាស្នេហ៍ និងភូមិគោកថ្មី ឃុំដូនកែវ ស្រុកពួក ខេត្តសៀមរាប បានទទួលអំណោយជាគ្រឿងឧបភោគបរិភោគពីព្រះសង្ឃ សប្បុរសជន និងសមាគមជីវិត និងក្ដីសង្ឃឹម ដោយអំណោយរួមមាន៖ អង្ករ ទឹកត្រី ទឹកស៊ីអ៊ីវ និងមីជាដើម។
លោក អែន ឌ្រាស់ តំណាងម្ចាស់ជំនួយ បានសំដែងនូវក្ដីសោមនស្សរីករាយ ដែលមានឱកាសជួយដល់បងប្អូនទាំងអស់។ លោកក៏បានសំណូមពរដល់បងប្អូនទាំងអស់ ដាច់ខាតអប់រំណែនាំកូនចៅឱ្យនៅឱ្យឆ្ងាយពីគ្រឿងញៀន និងល្បែងស៊ីសងផ្សេងៗ ដែលវានាំឱ្យខូចអនាគត សុខភាព និងអាយុជីវិត។
ព្រះធម្មានុរ័ក្ខញាណ ស៊ុម ពិសិទ្ធ ចៅអធិការវត្តប្រាសាទចាន់រង្សី មានថេរដីកាថា អំណោយទាំងនេះកើតចេញពីទឹកចិត្តសទ្ធាជ្រះថ្លារបស់ព្រះសង្ឃ និងសប្បុរសជនទាំងក្នុង នឹងក្រៅស្រុក ដែលការផ្ដល់ជូននេះ ដើម្បីជួយដោះស្រាយមួយរយៈពេលខ្លីប៉ុណ្ណោះ។ ជាមួយគ្នានេះ សូមញាតិញោមជំរុញលើកទឹកចិត្តកូនចៅឱ្យទៅរៀនសូត្រ ព្រមទាំងជួយបង្ហាត់បង្រៀនកូនៗបន្ថែមនៅផ្ទះ ពីព្រោះមានតែការសិក្សាទេដែលអាចជួយឱ្យរួចផុតពីភាពក្រីក្របាន។
តំណាងលោកមេឃុំដូនកែវ បានថ្លែងអំណរព្រះគុណ និងអរគុណព្រះសង្ឃ និងសប្បុរសជនទាំងអស់ ដែលបាននាំយកស្បៀងអាហារមកជូនដល់ប្រជាពលរដ្ឋដែលមានជីវភាពខ្វះខាតក្នុងមូលដ្ឋានលោកស្រីនាពេលនេះ ដែលវាពិតជាបានសបញ្ជាក់ឱ្យឃើញ ពីទឹកចិត្តដ៏ប្រពៃរបស់ព្រះសង្ឃ និងសប្បុរសជន ក្នុងការចូលរួមជាមួយរាជរដ្ឋាភិបាល និងអាជ្ញាធរមូលដ្ឋាន ជួយសង្គ្រោះគ្រួសារប្រជាពលរដ្ឋក្រីក្រ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
