ក្នុងពិធីបិទវគ្គបណ្ដុះបណ្ដាលជំនាញវិជ្ជាជីវៈដូនតាឆ្នាំសិក្សា២០២៤-២០២៥ និងបើកវគ្គបណ្ដុះបណ្ដាលជំនាញវិជ្ជាជីវៈដូនតា នៅខេត្តសៀមរាប នាថ្ងៃទី១៣ ខែឧសភានេះ លោកជំទាវបណ្ឌិតសភាចារ្យ ភឿង សកុណា រដ្ឋមន្រី្តក្រសួងវប្បធម៌ និងវិចិត្រសិល្បៈ បានលើកឡើងថា ការសិក្សាលើជំនាញវិជ្ជាជីវៈដូនតា មិនមែនសម្រាប់ដើម្បីមានការងារធ្វើតែមួយមុខទេ ប៉ុន្តែវាជាការវិនិយោគដ៏ធំលើមោទនភាពជាតិទាំងមូល។
លោកជំទាវបណ្ឌិតសភាចារ្យ ភឿង សកុណា មានប្រសាសន៍ថា វគ្គបណ្ដុះបណ្ដាលជំនាញវិជ្ជាជីវៈដូនតា បានជួយលើកស្ទួយ និងអភិរក្សជំនាញវិជ្ជាជីវៈដូនតា ជាមរតកវប្បធម៌អរូបី ដែលកំពុងបានផ្ទេរពីមនុស្សមួយជំនាន់ទៅមួយជំនាន់អស់រយៈកាលយូរឆ្នាំមកហើយ។ វគ្គបណ្ដុះបណ្ដាលនេះដែរ គឺជាការធ្វើឱ្យរស់រវើកឡើងវិញនៃព្រលឹងជាតិដែលជាមរតកនៃបុព្វបុរសខ្មែរ បំផុសនូវអត្តសញ្ញាណជាតិ ហើយបង្ហាញផ្លូវទៅមុខសម្រាប់យុវជនជំនាន់ក្រោយ។
លោកជំទាវ មានប្រសាសន៍ទៀតថា ការពិតសម្បត្តិវប្បធម៌របស់ប្រជាជាតិណាក៏ដោយបើទោះជាសម្បូរបែបណាក្ដី ក៏មិនអាចបន្តលូតលាស់បានដោយពុំមានធនធានមនុស្សដែលមានសមត្ថភាពនោះឡើយ។ ដូច្នេះហើយការបណ្ដុះបណ្ដាលជំនាញដូនតាមិនមែនជារឿងដែលធ្វើដើម្បីលម្អ ឬគ្រាន់តែបង្ហាញប៉ុណ្ណោះទេ តែគឺជាយុទ្ធសាស្ត្រដ៏ស្រួចស្រាវរបស់រាជរដ្ឋាភិបាល ដែលធានាការពារផងនូវចំណេះដឹងជាអមតៈរបស់ដូនតា និងជាការបើកផ្លូវសេដ្ឋកិច្ចដ៏សំខាន់មួយសម្រាប់យុវវ័យក្មេងៗរបស់យើងឱ្យមានឱកាស និងមោទនភាពក្នុងវិស័យវប្បធម៌ ទេសចរណ៍ ច្នៃប្រឌិត និងការសិក្សាស្រាវជ្រាវ។
ព័ត៌មានជាតិ ថ្មីៗ
លោកជំទាវ បង្ហាញថា នេះជាឆ្នាំទី១ នៃវគ្គបណ្ដុះបណ្ដាល ហើយក៏ជាបទពិសោធដំបូងរបស់ក្រសួងវប្បធម៌ និងវិចិត្រសិល្បៈ។ កន្លងមកការរៀបចំកម្មវិធីបណ្ដុះបណ្ដាល ការជ្រើសរើសគ្រូជំនាញ និងការជ្រើសរើសសិក្ខាកាម គឺជាឧបសគ្គដែលបណ្ដាលវគ្គបណ្ដុះបណ្ដាលរបស់យើងប្រព្រឹត្តទៅមិនបានរលូនដូចការគ្រោងទុក និងមានភាពយឺតយ៉ាវមួយចំនួន។ លោកជំទាវក៏រំពឹងថា ចាប់ពីឆ្នាំ២០២៥នេះតទៅ វគ្គបណ្ដុះបណ្ដាលរបស់យើងនឹងកាន់តែជោគជ័យ វិជ្ជាជីវៈដូនតាត្រូវបានអភិរក្ស រីឯការចូលរួមរបស់យុវជនកាន់តែផុលផុស៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
