កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា និងការរួមចំណែកពីប្រទេសជាមិត្ត ដៃគូអភិវឌ្ឍន៍ បានធ្វើឱ្យកម្ពុជាសម្រេចបាននូវសមិទ្ធផលយ៉ាងធំធេងសម្រាប់វិស័យសកម្មភាពមីនរយៈពេលជាង៣០ឆ្នាំមកនេះ ដោយក្នុងនោះចក្រភពអង់គ្លេស គឺជាដៃគូមួយយ៉ាងសំខាន់ ក្នុងចំណោមប្រទេសជាមិត្ត និងដៃគូអភិវឌ្ឍន៍ដទៃទៀត ដែលបានរួមចំណែកយ៉ាងខ្លាំងក្លាលើសកម្មភាពមនុស្សធម៌នេះ។
នេះបើតាមការលើកឡើងរបស់ ឯកឧត្ដមទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន ក្នុងឱកាសចុះឈ្វេងយល់អំពីសកម្មភាព និងចុះពិនិត្យលទ្ធផលនៃការងារបោសសម្អាតមីនរបស់អង្គការ HALO Trust នៅចំការមីនលើភ្នំគូលែន ស្រុកស្វាយលើ ខេត្តសៀមរាប កាលពីថ្ងៃទី១២ ខែឧសភា ឆ្នាំ២០២៥នេះ ដោយមានការចូលរួមពី ឯកឧត្ដម Charles Hay MVO នាយកទីភ្នាក់ងារកិច្ចការបរទេស ផ្ដល់ជំនួយ និងការអភិវឌ្ឍទទួលបន្ទុកតំបន់អាស៊ីអាគ្នេយ៍ និងប៉ាស៊ីហ្វិក នៃក្រសួងការបរទេសអង់គ្លេស។
ឯកឧត្ដមទេសរដ្ឋមន្រ្តី គូសបញ្ជាក់ថា កម្ពុជានៅបន្តដើរលើផ្លូវយ៉ាងវែងឆ្ងាយទៀត ក្នុងការដោះស្រាយបញ្ហាមីនដែលនៅសេសសល់។ ក្នុងនោះអាជ្ញាធរមីន បាននិងកំពុងរៀបចំនូវគោលនយោបាយជាតិសកម្មភាពមីន ២០២៦-២០៣៥ ដើម្បីឈានទៅសម្រេចបាននូវចក្ខុវិស័យ កម្ពុជាគ្មានផលប៉ះពាល់ដោយសារមីន និងសំណល់ជាតិផ្ទុះពីសង្គ្រាម។ ឯកឧត្ដម បានថ្លែងអំណរគុណចក្រភពអង់គ្លេស ដែលតែងតែផ្ដល់ការគាំទ្រ និងរួមចំណែកដល់សកម្មភាពមីនមនុស្សធម៌នៅកម្ពុជា។ ជាពិសេស អង្គការ HALO Trust ដែលបានចូលរួមចំណែកក្នុងកិច្ចការសកម្មភាពមីនមនុស្សធម៌នៅកម្ពុជា ចាប់តាំងពីឆ្នាំ១៩៩២មក ហើយសម្រេចបាននូវសមិទ្ធផលយ៉ាងធំធេងជូនប្រជាជនកម្ពុជា។
ក្នុងឱកាសនោះ ឯកឧត្ដម Charles Hay នាយកទីភ្នាក់ងារ FCDO ទទួលបន្ទុកអាស៊ីអាគ្នេយ៍ និងប៉ាស៊ីហ្វិក បានវាយតម្លៃខ្ពស់ចំពោះលទ្ធផលនៃការរួមចំណែករបស់ចក្រភពអង់គ្លេសសម្រាប់វិស័យសកម្មភាពមីននៅកម្ពុជា។ ឯកឧត្ដម បានសម្ដែងនូវការពេញចិត្តចំពោះលទ្ធផលជាក់ស្ដែងលើដីបោសសម្អាតមីនរួច ក្រោមជំនួយគាំទ្ររាជរដ្ឋាភិបាលនៃចក្រភពអង់គ្លេស។ ចំពោះការចុះពិនិត្យរបស់ទីភ្នាក់ងារ FCDO នាពេលនេះ គឺដើម្បីសិក្សាវាយតម្លៃអំពីលទ្ធផលសម្រេចបាន និងរៀបចំនូវរបាយការណ៍ដាក់ជូនរាជរដ្ឋាភិបាលអង់គ្លេស ធ្វើការពិនិត្យ និងពិចារណាលើការផ្តល់ជំនួយបន្តរបស់អង់គ្លេស ដែលនឹងត្រូវប្រជុំអនុម័តនៅក្នុង២០២៧ ខាងមុខ៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
