អាជ្ញាធរខេត្តសៀមរាប បានស្នើដល់គ្រប់ព្រះចៅអធិការវត្ត និងអាស្រមទាំងអស់ក្នុងតំបន់ ចូលរួមបំពេញតួនាទីភារកិច្ចរបស់ខ្លួន ក្នុងការការពារ និងអភិរក្សតំបន់រម្មណីយដ្ឋានអង្គរ ដែលសម្បត្តិបេតិកភណ្ឌជាតិខ្មែរនៃយើង រួមនិងវិស័យផ្សេងៗទៀត ក្នុងខេត្តមួយនេះឱ្យកាន់តែល្អប្រសើរ។
ក្នុងពិធីបើកសន្និបាតព្រះសង្ឃ ក្នុងតំបន់ឧទ្យានបេតិកភណ្ឌពិភពលោកអង្គរ ស្ដីពីវត្តអារាមពុទ្ធសាសនា បេតិកភណ្ឌ ទឹក បរិស្ថាន បម្រែបម្រួលអាកាសធាតុ និងសុវត្ថិភាពស្បៀង នៅថ្ងៃទី០៨ ខែឧសភានេះ លោក លី សារី អភិបាលរងខេត្ត មានប្រសាសន៍ថា ខេត្តសៀមរាប ជាតំបន់ទេសចរណ៍ប្រវត្តិសាស្រ្ត ជាសម្បត្តិបេតិកភណ្ឌពិភពលោកដ៏មានតម្លៃជាសកល ហើយក៏ជាតំបន់ប្រវត្តិសាស្រ្ត និងបែបធម្មជាតិផ្សេងៗទៀត សម្រាប់បម្រើដល់វិស័យទេសចរណ៍ជុំវិញពិភពលោក។ ដូច្នេះការចូលរួមអភិរក្ស និងការពារជាកាតព្វកិច្ចយើងទាំងអស់គ្នា ធ្វើយ៉ាងណាឱ្យសម្បត្តិបេតិកភណ្ឌមួយនេះ នៅគង់វង្សយូរអង្វែងទៀត សម្រាប់ជាផលិតផលទេសចរណ៍ដ៏ទាក់ទាញសម្រាប់ប្រទេសកម្ពុជា។
ព័ត៌មានជាតិ ថ្មីៗ
សម្ដេចព្រះព្រហ្មរតនមុនី ពិន សែម សិរីសុវណ្ណោ ព្រះរាជាគណៈថ្នាក់ទោគណៈមហានិកាយ ឧត្តមទីប្រឹក្សាសម្ដេចព្រះសង្ឃនាយក មានថេរដីកាថាក្នុងតំបន់ឧទ្យានបេតិកភណ្ឌពិភពលោកអង្គរ មានវត្តអារាម និងអាស្រម ជិត៤០កន្លែង ហើយរមែងមានឥទ្ធិពលទៅលើបេតិកភណ្ឌជាតិ និងបេតិកភណ្ឌពិភពលោកនេះ ទាំងវិជ្ជមានខ្លះ អវិជ្ជមានខ្លះ ហើយដែលនឹងប៉ះពាល់ទៅលើច្បាប់គោលការណ៍បេតិកភណ្ឌពិភពលោកដែលកំពុងអនុវត្ត និងប៉ះពាល់ដល់វិស័យទេសចរណ៍ជាតិខ្លះៗជាពុំខាន។ ក្នុងន័យនេះ គណៈសង្ឃនៃព្រះរាជាណាចក្រកម្ពុជា តែងមានការព្រួយបារម្ភ និងយកចិត្តទុកដាក់ដោះស្រាយជាមួយអាជ្ញាធរគ្រប់លំដាប់ថ្នាក់ ដើម្បីឱ្យវត្ត និងអាស្រមទាំងនោះ ស្ថិតនៅក្រោមច្បាប់នៃព្រះរាជាណាចក្រកម្ពុជា ព្រមទាំងចូលរួមក្នុងវិស័យផ្សេងៗ ដែលអាចនឹងលើកស្ទួយការអភិវឌ្ឍនៅតំបន់អង្គរនេះ ឱ្យបានប្រសើរឡើងផងដែរ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
