ក្រុមបងប្អូនអាជីវករ និងកសិករក្នុងខេត្តសៀមរាប បានបង្ហាញការគាំទ្រចំពោះចំណាត់ការរបស់រាជរដ្ឋាភិបាលកម្ពុជា ក្នុងការបិទការនាំចូលបន្លែផ្លែឈើពីប្រទេសថៃ ខណៈពួកគាត់បានអំពាវនាវដល់ប្រជាពលរដ្ឋខ្មែរ ងាកមកគាំទ្រផលិតផលក្នុងស្រុកឡើងវិញ ព្រោះបច្ចុប្បន្នកសិផលសំខាន់ក្នុងស្រុករបស់យើងក៏អាចផ្គត់ផ្គង់ដល់តម្រូវការប្រចាំថ្ងៃរបស់យើងបានផងដែរ។
ក្រុមអាជីវករពួកគាត់បានលើកឡើងថា ក្រោយបិទការនាំចូលបន្លែផ្លែឈើពីប្រទេសថៃ ការលក់ដូររបស់ពួកគាត់គឺដំណើរការធម្មតា ប៉ុន្តែបន្លែផ្លែឈើរបស់ពួកគាត់ គឺលក់តែរបស់ខ្មែរសុទ្ធ ហើយតម្លៃផលិតផលខ្មែរយើងក៏បានកាន់តែល្អប្រសើរផងដែរ។ ពួកគាត់ថាពីមុនតម្លៃដែលនាំបន្លែផ្លែឈើចូល គឺនៅលើមាត់ឈ្មួញ ប៉ុន្តែនៅពេលដែលយើងបិទបែបនេះ យើងអាចរក្សាតម្លៃផលិតផលរបស់យើងបាន ជាពិសេសកសិករដែលជាអ្នកដាំក៏អានមានទីផ្សារ និងជួយដល់សេដ្ឋកិច្ចរបស់ពួកគាត់ផងដែរ។
ដោយឡែកក្រុមកសិករ បានបង្ហាញដែរថា ពួកគាត់គាំទ្រចំពោះចំណាត់ការរបស់រាជរដ្ឋាភិបាល ព្រោះវាបានជួយជំរុញឱ្យទីផ្សារបន្លែផ្លែឈើរបស់កសិករខ្មែរយើង ធានាបាននូវគុណភាព រក្សាបាននូវតម្លៃ និងទីផ្សារ។ ពួកគាត់ក៏បានសំណូមពរដល់ប្រជាពលរដ្ឋងាកមកគាំទ្រផលិតផលខ្មែរ ខណៈបច្ចុប្បន្នប្រជាកសិករដាំបន្លែផ្លែឈើមានការកើនឡើងជាបន្តបន្ទាប់ ហើយមានគុណភាពខ្ពស់ជាងផលិតផលនាំចូលពីក្រៅប្រទេស៕
ព័ត៌មានជាតិ ថ្មីៗ
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
