នៅថ្ងៃទី២៩ ខែមិថុនា ឆ្នាំ២០២៥ វត្តដំណាក់ ក្រុងសៀមរាប បានរៀបចំពិធីបំបួសកុសលបុត្រចំនួន៣៦រូប តាមទំនៀមរបស់វត្តដែលតែងតែប្រារព្ធអស់កាល៥ ឬ ៦ឆ្នាំជាប់ៗគ្នាមកហើយ ដើម្បីសងគុណមាតាបិតា និងទ្រទ្រង់ពុទ្ធសាសនាឱ្យបានស្ថិតស្ថេរចិរកាលទៅមុខ និងដើម្បីភាពរីកចម្រើននៃពុទ្ធសាសនាកម្ពុជារបស់យើង។
ព្រះគ្រូ ធម្មវិសុទ្ធិរង្សី ឡាច ចន្ថា ព្រះគ្រូចៅអធិការវត្តដំណាក់ ក្រុងសៀមរាប មានថេរដីការថា អត្ថន័យនៃការបួសផ្នែកតាមបុរាណាចារ្យខ្មែរ លោកជឿថា ការបួស គឺដើម្បីសងគុណឪពុកម្ដាយជាអ្នមានគុណរបស់ខ្លួន ដោយបានបង្កើតពំនោលទុកមកថា “បួសណេនសងគុណម៉ែ បួសភិក្ខុសងគុណឱ”។ ឆ្នាំនេះកុលបុត្រចំនួន៣៦នាក់ បានមានសទ្ធាជ្រះថ្លាបំពេញឧបសម្បទាជាភិក្ខុភាវៈ ក្រោយបានបួសជាសាមណេរអស់រយៈពេលជាច្រើនវស្សាមកហើយ។
ព្រះគ្រូ ឡាច ចន្ថា បន្តថា ចំពោះការបំពេញឧបសម្បទាជាភិក្ខុភាវៈនេះ គឺជាកិច្ចមួយដើម្បីបំពេញលក្ខណៈជាអ្នកបួសឱ្យបានគ្រប់លំដាប់ក្នុងវិន័យបញ្ញត្តិ ពោលគឺសាមណេរដែលមានព្រះជន្ម២០វស្សាហើយ គឺអាចបំពេញឧបសម្បទាជាភិក្ខុបានហើយ។ ប៉ុន្តែបើកុលបុត្រណាមិនទាន់មានបំណងបំពេញឧបសម្បទា ក៏អាចបន្តស្ថិតនៅក្នុងភាពសាមណេរបានមិនជាអ្វីនោះទេ។
ព័ត៌មានជាតិ ថ្មីៗ
ព្រះគ្រូចៅអធិការ ក៏បានបញ្ជាក់ថា ប្រយោជន៍ការបំពេញឧបសម្បទាមាន៤ គឺ១.បានតម្លើងឋានៈរបស់ខ្លួនពីកម្រិតទាបទៅកាន់កម្រិតខ្ពស់មួយក្នុងពុទ្ធសាសនា, ២.បានជួយបន្តទ្រទ្រង់ពុទ្ធសាសនាតាមរយៈភេទជាអ្នកទ្រទ្រង់ត្រៃចីវរ(អ្នកបួស), ៣.បានបន្តចម្រើននិស្ស័យជាអ្នកបួសពោលគឺបានបន្តបំពេញនេក្ខម្មបារមីបន្តទៀត និង៤.បានជាសម្មតិសង្ឃស្រែបុណ្យសម្រាប់ពុទ្ធបរិស័ទបំពេញបុណ្យកុសល រក្សាសីល និង ចម្រើនមេត្តាភាវនាជាដើម។ លើសពីនេះទៅទៀត គឺដើម្បីបានឱកាសបន្តការសិក្សារៀនសូត្រវិជ្ជាផ្សេងៗទាំងពុទ្ធចក្រ និងអាណាចក្រឱ្យបានកាន់តែទូលំទូលាយ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
