ក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាស្រុក អាណត្តិទី៤ ឆ្នាំ២០២៥ នៅថ្ងៃទី៣០ ខែមិថុនានេះ លោក ទៀប ប៊ុនឈួយ ប្រធានក្រុមប្រឹក្សាស្រុកប្រាសាទបាគង ខេត្តសៀមរាប បានលើកឡើងថា ប្រជាពលរដ្ឋមានតួនាទីសំខាន់នៅក្នុងការរាយការណ៍អំពីបញ្ហាប្រឈមនានាដែលបានជួបប្រទះនៅមូលដ្ឋាន ដើម្បីបង្កភាពងាយស្រួលដល់អាជ្ញាធរក្នុងការដោះស្រាយបញ្ហា។
លោក ទៀប ប៊ុនឈួយ លើកឡើងទៀតថា ស្ថិតក្នុងបរិបទនៃការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ គឺជាកាលានុវត្តភាពមួយ ដែលរដ្ឋបាលស្រុករៀបចំឱ្យមានជាវេទិកាផ្សព្វផ្សាយ និងពិគ្រោះយោបល់នេះឡើង ដើម្បីផ្ដល់ឱកាសជូនបងប្អូនប្រជាពលរដ្ឋអ្នកពាក់ព័ន្ធទាំងអស់ បានស្វែងយល់ពីស្ថានភាពទូទៅនៃការអភិវឌ្ឍមូលដ្ឋាន ព្រមទាំងបញ្ហាប្រឈមនានា ដែលកើតមាននារយៈកាលកន្លងមក។ ម្យ៉ាងវិញ ទៀត វេទិកានេះក៏ផ្ដល់នូវឱកាសជូនបងប្អូនប្រជាពលរដ្ឋ អ្នកពាក់ព័ន្ធទាំងអស់ ក្នុងការបញ្ចេញមតិរបស់ខ្លួនដែលពាក់ព័ន្ធនឹងក្ដីកង្វល់ សំណូមពរ តម្រូវការជាក់ស្ដែងក្នុងមូលដ្ឋានផងដែរ។
លោកបន្តថា វេទិកាផ្សព្វផ្សាយ និងពិគ្រោះយោបល់មានសារៈសំខាន់សម្រាប់លើកកម្ពស់គណនេយ្យភាព តម្លាភាព ការឆ្លើយតប និងការចូលរួមរបស់ប្រជាពលរដ្ឋទាំងបុរស ស្រ្តី យុវវ័យ និងជនងាយរងគ្រោះ ក្នុង កិច្ចដំណើរការអភិបាលកិច្ចរបស់ក្រុមប្រឹក្សានៃរដ្ឋបាលថ្នាក់ក្រោមជាតិ។ អង្គវេទិកានាពេលនេះ ពិតជានឹងផ្ដល់ជូនដល់ប្រជាពលរដ្ឋ នៅតាមមូលដ្ឋាននូវឱកាសយ៉ាងធំ ធេង បានលើកពីបញ្ហាប្រឈម ក្ដីកង្វល់ សំណូមពរនានា ដើម្បីអាជ្ញាធរមានសមត្ថកិច្ច ពិនិត្យដោះស្រាយ និង ឆ្លើយតបចំពោះតម្រូវការ ដែលបានលើកឡើងទាំងនោះ។
សូមជម្រាបថា វេទិកានេះ ក៏មានការចូលរួមពីសំណាក់ឯកឧត្តម លោកជំទាវ ជាសមាជិកសមាជិកាក្រុមប្រឹក្សាខេត្តសៀមរាប តំណាងមន្ទីរអង្គភាពជំនាញ អាជ្ញាធរមូលដ្ឋាន ប្រជាពលរដ្ឋ និងសិស្សានុសិស្សជាច្រើនរូប៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
