តបតាមសំណូមពរ និងពិនិត្យឃើញស្ថានភាពខ្វះខាតជាក់ស្ដែងរបស់លោកយាយលោកតាចំនួន១១គ្រួសារ រស់នៅភូមិព្រែកស្រមោច ឃុំកំពង់ឃ្លាំង ស្រុកសូទ្រនិគម ខេត្តសៀមរាប នាល្ងាចថ្ងៃទី០៩ ខែកក្កដា ឆ្នាំ២០២៥នេះ ព្រះវិចិត្រវង្សា ហែម គឹមសាន ព្រះគ្រូចៅអធិការវត្តប្រាសាទគោកចក ក្រុងសៀមរាប បានយកគ្រឿងឧបភោគបរិភោគ និងថវិកាមួយចំនួន ផ្ដល់ជូនដល់លោកយាយលោកតា ជួយសម្រាលការលំបាកបានមួយគ្រាក្នុងជីវភាពប្រចាំថ្ងៃ។
ព្រះវិចិត្រវង្សា ហែម គឹមសាន បានមានថេរដីកាថា សង្គហៈទានជាគ្រឿងឧបភោគបរិភោគនេះ គឺបានមកពីការប្រគេនរបស់ពុទ្ធបរិស័ទក្នុងពិធីបុណ្យផ្សេងៗនាពេលកន្លងមក ហើយគណៈកម្មការ និងចៅអធិការវត្តបានសន្សំបម្រុងទុក ដើម្បីចែករំលែក និងផ្តល់ជូនដល់គ្រួសារដែលមានជីវភាពខ្វះខាត ឬក៏ជួបហានិភ័យដោយសារគ្រោះធម្មជាតិផ្សេងៗ ទៅតាមលទ្ធភាពដែលព្រះសង្ឃអាចធ្វើបាន។
ព្រះគ្រូចៅអធិការ បានជំរុញឱ្យជនរួមជាតិទាំងអស់ ត្រូវចេះរួមសុខរួមទុក្ខ ជួយទុក្ខធុរៈសង្គ្រោះគ្នាទៅវិញទៅមកក្នុងគ្រាលំបាក ហើយការផ្តល់នូវស្បៀងអាហារពេលនេះ គឺកើតចេញពីទឹកចិត្តសទ្ធាជ្រះថ្លារបស់ព្រះអង្គ រួមទាំងសប្បុរសជនជិតឆ្ងាយបានចូលរួម ទោះជាមិនអាចដោះស្រាយបញ្ហាខ្វះខាតបានទាំងស្រុង តែវាអាចជួយដោះស្រាយមួយរយៈពេលខ្លីដែរ៕
ព័ត៌មានជាតិ ថ្មីៗ
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
