នៅព្រឹកថ្ងៃទី២៥ ខែកក្កដា ឆ្នាំ២០២៥នេះ អគារមជ្ឈមណ្ឌលវិទ្យាសាស្ត្រអភិរក្សអប្សរា ត្រូវបានសម្ពោធជាផ្លូវការ ក្រោមជំនួយនៃកិច្ចសហប្រតិបត្តិការពីទីភ្នាក់ងារបេតិកភណ្ឌកូរ៉េ ដែលនៅក្នុងមជ្ឈមណ្ឌលនេះ គឺជាបន្ទប់ពិសោធន៍តាមបែបវិទ្យាសាស្ត្រទំនើប ដើម្បីជួយដល់ការងារអភិរក្សវត្ថុបុរាណនានា ដែលបានរកឃើញពីឧទ្យានបុរាណវិទ្យាអង្គរ។
លោក យុនសាំង គីម ( Hyunsung Kim ) អគ្គនាយកស្ដីទីអន្តរជាតិនៃមជ្ឈមណ្ឌលសហប្រតិបត្តិការទីភ្នាក់ងារបេតិកភណ្ឌកូរ៉េ (KHA) បានឱ្យដឹងថា មជ្ឈមណ្ឌលវិទ្យាសាស្ត្រអភិរក្សអប្សរា ដែលបានសម្ពោធដាក់ឱ្យប្រើប្រាស់នេះ បានបំពាក់ឧបករណ៍ឯកទេសផ្នែកវិទ្យាសាស្ត្រ និងបច្ចេកវិទ្យាទំនើប សរុបចំនួន៦៧ប្រភេទ ដែលមានតម្លៃប្រមាណ៣០ម៉ឺនដុល្លារ។ លោកថាបន្ទាប់ពីសម្ពោធដាក់ឱ្យដំណើរការរួចហើយ ទីភ្នាក់ងារបេតិកភណ្ឌកូរ៉េ ក៏គ្រោងនឹងជួយបណ្ដុះបណ្ដាលផ្នែកបច្ចេកទេសដល់មន្ត្រី និងបុគ្គលិកនៃអាជ្ញាធរជាតិអប្សរា ដោយផ្ដោតលើបច្ចេកទេសអភិរក្សលោហៈ សេរ៉ាមិច និងវត្ថុបុរាណធ្វើពីថ្មនានាផងដែរ។
លោក យុនសាំង គីម បន្តថា តាមរយៈការបង្កើតមជ្ឈមណ្ឌលវិទ្យាសាស្ត្រអភិរក្សអប្សរារួម និងការបណ្ដុះបណ្ដាលបច្ចេកទេសវិទ្យាសាស្ត្រ ដល់មន្ត្រី និងបុគ្គលិកនៃអាជ្ញាធរជាតិអប្សរានេះ កូរ៉េរំពឹងថា បុគ្គលិកដែលទទួលបានការបណ្ដុះបណ្ដាលនឹងកាន់តែមានការអភិវឌ្ឍន៍សមត្ថភាព លើជំនាញថែរក្សាបេតិកភណ្ឌវប្បធម៌ដ៏មានតម្លៃនៃអង្គរប្រកបដោយសុវត្ថិភាព និងមានលក្ខណៈវិទ្យាសាស្ត្រកាន់តែទូលំទូលាយថែមទៀត។
ព័ត៌មានជាតិ ថ្មីៗ
លោកស្រី លី អ៊ុន បុក (Lee Eun bok) អគ្គនាយកគោលនយោបាយបេតិកភណ្ឌ របស់ការិយាល័យបេតិកភណ្ឌសេវាកម្មនៃសាធារណរដ្ឋកូរ៉េ បានបង្ហាញថា មជ្ឈមណ្ឌលវិទ្យាសាស្ត្រ ដែលសម្ពោធឱ្យប្រើប្រាស់ពេលនេះ គឺជាផ្នែកមួយនៃគម្រោងកិច្ចសហប្រតិបត្តិការអន្តរជាតិ រវាងកូរ៉េ-កម្ពុជា នៅប្រាសាទអង្គរវត្ត។ ចាប់តាំងពីឆ្នាំ២០១០មក កូរ៉េបានគាំទ្រឧបករណ៍ជាច្រើនសម្រាប់ការងារអភិរក្សនៅតំបន់អង្គរ និងសារមន្ទីរជាតិ។ កាលពីឆ្នាំ២០១៣ សេវាបេតិកភណ្ឌកូរ៉េ និងអាជ្ញាធរជាតិអប្សរា បានចុះអនុស្សរណៈនៃការយោគយល់គ្នា សម្រាប់គម្រោងអភិរក្ស និងជួសជុលប្រាសាទព្រះពិទូ។ ចាប់ផ្ដើមនៅឆ្នាំ២០២៤ កូរ៉េក៏កំពុងធ្វើការលើគម្រោងអភិរក្ស និងជួសជុលប្រាសាទអង្គរវត្តផងដែរ។
លោកស្រី បញ្ជាក់ទៀតថា ការជឿទុកចិត្ត បានកសាងឡើងជាង២០ឆ្នាំ នៃកិច្ចសហប្រតិបត្តិការបេតិកភណ្ឌវប្បធម៌រវាងកម្ពុជា និងកូរ៉េ នឹងត្រូវបានពង្រឹងឱ្យមាននិរន្តរភាពបន្ថែមទៀត តាមរយៈការបើកមជ្ឈមណ្ឌលវិទ្យាសាស្ត្រអភិរក្សនេះ៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
