ការងារស្ម័គ្រចិត្ត គឺជាការធ្វើកិច្ចការណាមួយដែលយើងពេញចិត្តធ្វើដោយខ្លួនឯង គ្មាននរណាមកបង្ខំ ឬគំរាមកំហែងឱ្យធ្វើឡើយ។ ការងារស្ម័គ្រចិត្តជាកន្លែងហាត់ការដ៏ល្អបំផុតសម្រាប់យុវជន ដើម្បីទទួលបានបទពិសោធន៍។ បទពិសោធន៍ពីការងារស្ម័គ្រចិត្តនេះ នឹងអាចយកទៅអនុវត្តនៅតាមស្ថាប័ន ឬក្រុមហ៊ុនដែលខ្លួនបំពេញការងារនៅថ្ងៃអនាគត។
កញ្ញា រ៉ា រដ្ឋា យុវតីមកពីស្រុកប្រាសាទបាគង ដែលបាននិងកំពុងចូលរួមក្នុងការងារស្ម័គ្រចិត្ត បានឱ្យដឹងថា បច្ចុប្បន្នមានកត្តាមួយចំនួនដែលជាការរាំងស្ទះដល់ការចូលរួមការងារស្ម័គ្រចិត្តរបស់យុវជន ដូចជា៖ កត្តាផ្ទាល់ខ្លួន កត្តាពីសង្គម និងបរិយាកាស និង កត្តាពីអង្គការ ឬកម្មវិធីស្ម័គ្រចិត្តជាដើម។ កញ្ញាថា ក្នុងចំណោមកត្តាទាំងអស់នេះ កត្តាខ្លួនឯង គឺជាកម្លាំងចលករមួយដែលសំខាន់។ នេះក៏ដោយសារតែបើយើងគ្មានជំនឿចិត្តថាយើងអាចធ្វើការងារនោះបានទេ ទោះបីមានការជួយជ្រោមជ្រែង និងលើកទឹកចិត្តពីមជ្ឈដ្ឋានច្រើនយ៉ាងណាក្ដី ក៏យើងមិនអាចធ្វើវាបានដែរ។
កញ្ញា រ៉ា រដ្ឋា បន្តថា ការងារស្ម័គ្រចិត្តបានជួយបង្រៀនយុវជនយើងច្រើនណាស់ បានធ្វើឱ្យយុវជនមានការផ្លាស់ប្ដូរជាវិជ្ជមាន និងទទួលបានការទទួលស្គាល់ពីសហគមន៍ទាំងមូល។ លើសពីនេះ យុវជនក៏ជាអ្នកនាំសារពីក្ដីកង្វល់ និងបញ្ហាប្រឈមរបស់ប្រជាពលរដ្ឋក្នុងមូលដ្ឋាន ទៅកាន់អាជ្ញាធរមូលដ្ឋានផងដែរ។ កញ្ញាក៏បានលើកទឹកចិត្តឱ្យយុវជនទាំងអស់ចូលរួមអភិវឌ្ឍន៍សហគមន៍ តាមរយៈការងារស្ម័គ្រចិត្ត ដែលនឹងក្លាយជាស្ពាននាំទៅអនាគតល្អប្រសើរ។
បើតាមលោកស្រី សារឿន ចន្នី អ្នកសម្របសម្រួលនៃមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព (PDP) បានបង្ហាញថា ជាការពិតណាស់ កត្តាខ្លួនឯង គឺជាកត្តាចម្បងដែលទាមទារឱ្យយុវជនត្រូវតែសម្រេចចិត្តឱ្យបានត្រឹមត្រូវ ដើម្បីបានចូលរួមក្នុងការងារស្ម័គ្រចិត្ត។ មិនថាការងារបរិស្ថាន ការងារអប់រំ ឬកិច្ចអភិវឌ្ឍន៍មូលដ្ឋានណាមួយនោះទេ យុវជនសុទ្ធតែមានឱកាសក្នុងការចូលរួម។ លោកស្រីក៏បានលើកទឹកចិត្តដល់យុវជនទាំងអស់ឱ្យចូលរួមក្នុងសកម្មភាពការងារស្ម័គ្រចិត្តឱ្យបានផុលផុស ខណៈបច្ចុប្បន្នការជំរុញលើកទឹកចិត្ត និងផ្ដល់ឱកាសពីមជ្ឈដ្ឋានជុំវិញខ្លួនកំពុងមានសញ្ញាណជាវិជ្ជមាន។
អត្ថបទ៖ លោកស្រី ហែម បូរ៉ាន្នី
កែសម្រួល៖ លោក អ៊ុន ណារាជ្យ
