ក្នុងកិច្ចប្រជុំដើម្បីឆ្លុះបញ្ចាំងលើការរៀបចំទីតាំងសុវត្ថិភាព ការគ្រប់គ្រងជនភៀសសឹក និងប្រជាពលរដ្ឋដែលវិលត្រឡប់មកពីប្រទេសថៃ នៅថ្ងៃទី១៤ ខែសីហានេះ លោក លី វណ្ណៈ នាយករដ្ឋបាលសាលាខេត្តសៀមរាប បានណែនាំដល់រដ្ឋបាលក្រុងស្រុក ត្រូវយកចិត្តទុកដាក់ខ្ពស់ចំពោះពលករដែលត្រឡប់មកពីប្រទេសថៃ បងប្អូនជនភៀសសឹក ជាពិសេសបន្តជួយឧបត្ថម្ភគាំទ្រដល់ក្រុមគ្រួសារកងទ័ពដែលបានពលីឱ្យបានល្អប្រសើរ និងសក្ដិសមចំពោះការលះបង់ដ៏ធំធេងរបស់ពួកគាត់ចំពោះជាតិ និងប្រជាជនយើង។
លោក លី វណ្ណៈ មានប្រសាសន៍ថា ជម្លោះព្រំដែនកម្ពុជា-ថៃ ក៏ដូចជាសភាពការណ៍កើតឡើងថ្មីៗនេះ គឺជាវិញ្ញាសាដែលយើងទាំងអស់គ្នាត្រូវយកមកធ្វើការឆ្លុះបញ្ចាំង បង្កើនការប្រឹងប្រែង ដើម្បីពង្រឹងខ្លួនឯងឱ្យខ្លាំងជាងមុន ល្អជាងមុន ជាពិសេសកសាង និងពង្រឹងធនធានមនុស្ស ឱ្យក្លាយជាប្រជាជាតិមួយដែលមានប្រជាជនដែលខ្លាំងពូកែ អាចការពារខ្លួនឯងបាន មានភាពម្ចាស់ការ ក្នុងការកសាង និងអភិវឌ្ឍប្រទេសជាតិឱ្យសម្បូររុងរឿងជាលំដាប់។ ទាំងអស់គ្នាក៏ត្រូវបន្តរួបរួមគ្នាជាធ្លុងមួយ ពង្រឹងសាមគ្គីភាព និងឯកភាពជាតិរឹងមាំ សំដៅរួមគិត និងចូលរួមគាំទ្រ ដើម្បីបង្កើនការផ្សារភ្ជាប់រវាងសមរភូមិក្រោយជាមួយសមរភូមិមុខ។
លោកបញ្ជាក់ថា កិច្ចប្រជុំនាពេលនេះ ស្របនឹងផែនការយុទ្ធសាស្ត្រឆ្លើយតបបន្ទាន់ ដើម្បីធានាថាអ្នកដែលងាយរងគ្រោះបំផុតទទួលបានការការពារ និងគាំទ្រប្រកបដោយសុវត្ថិភាព និងទទួលបាននូវជំនួយសង្គ្រោះ ដើម្បីបំពេញនៅការខ្វះខាតជីវភាពប្រចាំថ្ងៃរបស់ពួកគាត់ប្រកបដោយនិរន្តរភាព ដែលរងផលប៉ះពាល់ពីសង្គ្រាម។ ក្នុងន័យនេះ ក៏សូមឱ្យអាជ្ញាធរមូលដ្ឋានត្រូវផ្ដោតការយកចិត្តទុកដាក់អនុវត្តលើកិច្ចការអាទិភាពមួយចំនួនដូចជា ការបន្តពង្រឹងប្រសិទ្ធភាពនៃការផ្ដល់សេវាគ្រប់ប្រភេទ, សេវាសន្តិសុខសណ្ដាប់ធ្នាប់, សេវាយុត្តិធម៌, សេវាអប់រំ, សុខាភិបាល, រដ្ឋបាល និងសេវាពាក់ព័ន្ធអាជីវកម្ម, ធុរកិច្ច និងប្រព័ន្ធគាំពារសង្គម ព្រមទាំងបន្តដោះស្រាយបញ្ហាសមធម៌ និងយុត្តិធម៌សង្គម។
សូមជម្រាបថា គិតត្រឹមល្ងាចថ្ងៃទី១៣ ខែសីហា ឆ្នាំ២០២៥ ខេត្តសៀមរាប មានបងប្អូនជាជនភៀសសឹកចំនួន ២ ៣០៧គ្រួសារ ស្មើនឹង ៧ ៥៥៨នាក់ ដែលកំពុងស្នាក់នៅតាមទីតាំងសុវត្ថិភាពដែលរៀបចំនៅតាមបណ្ដាក្រុងស្រុក និងតាមលំនៅឋានរបស់បងប្អូនប្រជាពលរដ្ឋ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
