មន្ត្រីជាន់ខ្ពស់ក្រសួងទេសចរណ៍ លើកឡើងថា ស្ថិតិទេសចរណ៍ស្ថិតក្នុងប្រភេទស្ថិតិតាមវិស័យ ដែលសំដៅលើទិន្នន័យដែលប្រមូលចងក្រង រៀបចំ វិភាគដោយក្រសួងទេសចរណ៍សហការជាមួយក្រសួងស្ថាប័ន អាជ្ញាធរថ្នាក់ក្រោមជាតិពាក់ព័ន្ធ ដើម្បីរៀបចំផលិតជាទិន្នន័យផ្លូវការសម្រាប់ប្រើប្រាស់ក្នុងវិស័យទេសចរណ៍ ប្រកាសនេះសូមឱ្យអ្នកពាក់ព័ន្ធ ត្រូវពង្រឹងកិច្ចសហការលើការប្រមូល និងការគ្រប់គ្រងទិន្នន័យនេះ។
ក្នុងឱកាសបើកសិក្ខាសាលា ស្ដីពីការពង្រឹងគុណភាព និងសង្គតិភាពទិន្នន័យទេសចរណ៍ នៅខេត្តសៀមរាប នាថ្ងៃទី១៤ ខែសីហា ឆ្នាំ២០២៥នេះ ឯកឧត្តម កាទើ មហាម៉ាត់ណោសស្រ៊ី រដ្ឋលេខាធិការក្រសួងទេសចរណ៍ មានប្រសាសន៍ថា សូចនាករទេសចរណ៍ និងស្ថិតិទេសចរណ៍ផ្លូវការ មានសារៈសំខាន់ណាស់ មិនត្រឹមតែបម្រើឱ្យការប្រើប្រាស់ក្នុងវិស័យទេសចរណ៍តែមួយប៉ុណ្ណោះទេ តែត្រូវបានវិស័យផ្សេងៗជាច្រើនទៀត ក៏យកមកប្រើប្រាស់ជាសូចនាករវាស់វែងមួយដ៏សំខាន់ ក្នុងការធ្វើសេចក្ដីសម្រេច ការគ្រប់គ្រង ការសិក្សាទីផ្សារ ការវិភាគសេដ្ឋកិច្ច ការដាក់ចេញ ឬកែសម្រួលនូវគោលនយោបាយ យុទ្ធសាស្ត្រអភិវឌ្ឍន៍ និងផែនការសកម្មភាពនានា។
ព័ត៌មានជាតិ ថ្មីៗ
ឯកឧត្តមបញ្ជាក់ថា ដើម្បីជាមូលដ្ឋានវាស់វែងដ៏ត្រឹមត្រូវ និងប្រាកដនិយម “ស្ថិតិ” គឺជាយន្តការតាមដាន និងវាយតម្លៃលើការអនុវត្តគោលនយោបាយជាតិលើវិស័យទេសចរណ៍ ដោយការអភិវឌ្ឍស្ថិតិត្រូវឈរលើមូលដ្ឋាននៃគោលការណ៍៖ ភាពត្រឹមត្រូវ ភាពឯករាជ្យ ភាពពិតប្រាកដ ភាពគួរឱ្យទុកចិត្តបាន ភាពសំខាន់ និងភាពទាន់ពេលវេលា។ ជាមួយគ្នានេះ ឯកឧត្តមបានស្នើដល់ភាគីពាក់ព័ន្ធ បន្តពង្រឹងកិច្ចសហការលើការប្រមូល និងការគ្រប់គ្រងទិន្នន័យ តាមដាន ត្រួតពិនិត្យ និងវាយតម្លៃតាមសូចនាករដោយផ្អែកលើមូលដ្ឋានវិទ្យាសាស្ត្រ សម្រាប់ឧស្សាហកម្មទេសចរណ៍កម្ពុជា។
លោក ង៉ូវ សេងកាក់ អភិបាលរងខេត្តសៀមរាប មានប្រសាសន៍ថា ទិន្នន័យស្ថិតិដែលមានគុណភាពល្អ គឺជាគន្លឹះសំខាន់សម្រាប់ការកំណត់គោលនយោបាយ ការធ្វើផែនការអភិវឌ្ឍន៍យុទ្ធសាស្រ្ត និងការគ្រប់គ្រងវិស័យទេសចរណ៍ប្រកបដោយប្រសិទ្ធភាព ដើម្បីឆ្លើយតបទៅនឹងការប្រែប្រួលនិន្នាការទីផ្សារ និងការប្រកួតប្រជែងទាំងក្នុងតំបន់ និងអន្តរជាតិ។ ខេត្តសៀមរាប ជាគោលដៅទេសចរណ៍សំខាន់របស់ប្រទេស មានសម្បត្តិធម្មជាតិ និងវប្បធម៌ប្រវត្តិសាស្ត្រ ដូច្នេះការមានប្រព័ន្ធគ្រប់គ្រងទិន្នន័យស្ថិតិដែលត្រឹមត្រូវ និងទាន់សម័យ គឺជាឧបករណ៍គាំទ្រយ៉ាងសំខាន់ សម្រាប់ការអភិវឌ្ឍយុទ្ធសាស្រ្តទេសចរណ៍ឱ្យមានប្រសិទ្ធភាព និងឆ្លងកាត់បញ្ហាប្រឈមនានាឱ្យទទួលបានដោយជោគជ័យ៕
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
