បងប្អូនជាជនភៀសសឹកក្នុងភូមិសាស្ត្រខេត្តសៀមរាប បានបង្ហាញក្ដីរំភើប និងគោរពថ្លែងអំណរគុណចំពោះ រាជរដ្ឋាភិបាល ថ្នាក់ដឹកនាំខេត្តសៀមរាប និងអាជ្ញាធរគ្រប់ជាន់ថ្នាក់ ដែលបានយកចិត្តទុកដាក់ខ្ពស់ចំពោះបងប្អូនជាជនភៀសសឹកដែលបានជម្លៀសចេញពីតំបន់សមរភូមិ ការយកចិត្តទុកដាក់នេះ រួមមានទាំងការស្នាក់នៅ ការហូបចុក ស្បៀងអាហារ សម្ភារប្រើប្រាស់ ថ្នាំសង្កូវ ជាពិសេសការរៀបចំរថយន្តរបស់រដ្ឋបាលខេត្តសៀមរាប ជូនបងប្អូនភៀសសឹកត្រឡប់ទៅលំនៅឋានវិញ នៅព្រឹកថ្ងៃទី១៣ ខែសីហា ឆ្នាំ២០២៥នេះ។
បងប្អូនភៀសសឹកលើកឡើងថា ការស្នាក់នៅក្នុងខេត្តសៀមរាប អាជ្ញាធរ រួមនឹងព្រះសង្ឃ បានយកចិត្តទុកដាក់ខ្ពស់ចំពោះសុខទុក្ខបងប្អូនជនភៀសសឹកទាំងអស់ ដោយមិនឱ្យមានអ្នកណាខ្វះខាត់ស្បៀងអាហារ កន្លែងស្នាក់នៅ និងសម្ភារប្រើប្រាស់ឡើយ។ ដោយឡែកនៅពេលពួកគាត់ត្រូវឡប់ទៅកាន់លំនៅឋាននេះ អាជ្ញាធរខេត្តសៀមរាប ក៏បានរៀបចំរថយន្តដឹកជញ្ជូនពួកគាត់ត្រឡប់ទៅវិញដោយឥតគិតថ្លៃផងដែរ។
ជាមួយគ្នានេះ បងប្អូនជនភៀសសឹក បានថ្លែងអំណរគុណដល់រាជរដ្ឋាភិបាលកម្ពុជា ជាពិសេស សម្ដេចតេជោ ហ៊ុន សែន និង សម្ដេចធិបតី ហ៊ុន ម៉ាណែត ដែលសម្ដេចបានខិតខំ ប្រឹងប្រែងដឹកនាំដោះស្រាយបញ្ហាព្រំដែន រហូតដល់មានបទឈប់បាញ់ បន្ដនាំយកនូវសុខសនិ្ដភាពជូនប្រជាជនជនខ្មែរ ហើយបងប្អូនភៀសសឹកក៏អាចត្រឡប់ទៅកាន់លំនៅឋានវិញបាន។ ជាពិសេស ពួកគាត់ក៏សូមអរគុណ និងដឹងគុណដល់កងទ័ពទាំងអស់ ដែលបានពលីជីវិត និងបូជាសាច់ស្រស់ ឈាមស្រស់ ការពារអធិបតេយ្យភាព ដែនដីកម្ពុជាយ៉ាងរឹងមាំបំផុត៕
…….សម្ភាសន៍បងប្អូនភៀសសឹក ២……..
អត្ថបទ និងរូបភាព៖ លោក អោត រត់
កែសម្រួល៖ លោក អ៊ុន ណារាជ្យ
