នៅព្រឹកថ្ងៃទី១៩ ខែសីហា ឆ្នាំ២០២៥ បងប្អូនប្រជាពលរដ្ឋមានជីវភាពខ្វះខាតចំនួន ៤៦ គ្រួសារ ដែលរស់នៅក្នុងសង្កាត់គោកចក ក្រុងសៀមរាប បានទទួលអំណោយជាគ្រឿងឧបភោគបរិភោគ និងសម្ភារប្រើប្រាស់ពីសប្បុរសជននៃប្រទេសអូស្ត្រាលី និងព្រះគ្រូចៅអធិការវត្តប្រាសាទគោក ដើម្បីដោះស្រាយជីវភាពប្រចាំថ្ងៃតាមរយៈអាជ្ញាធរមូលដ្ឋាន។
លោកស្រី ឈិន សាវី ចៅសង្កាត់គោកចក បានលើកឡើងថា ការផ្ដល់អំណោយជូនបងប្អូនប្រជាពលរដ្ឋនាពេលនេះ គឺជាទឹកចិត្តមនុស្សធម៌ និងជាការយកចិត្តទុកដាក់គិតគូរពីសុខទុក្ខ ចូលរួមរំលែកការលំបាករបស់បងប្អូនប្រជាពលរដ្ឋមានជីវភាពខ្វះខាតនៅតាមមូលដ្ឋាន ដែលកំពុងតែមានតម្រូវការចាំបាច់ក្នុងជីវភាពប្រចាំថ្ងៃពីសប្បុរសជន។ លោកស្រីក៏បានអំពាវនាវដល់សប្បុរសជនបន្តជួយឧបត្ថម្ភបន្ថែមទៀត ក្នុងន័យចូលរួមជាមួយអាជ្ញាធរសង្កាត់ ដើម្បីមានលទ្ធភាពផ្គត់ផ្គង់ និងចែកជូនដល់ប្រជាពលរដ្ឋដែលមានជីវភាពខ្វះខាតក្នុងមូលដ្ឋាន។
លោកស្រីចៅសង្កាត់បន្តថា អំណោយដែលបានផ្ដល់ជូននេះដែរ ជាការចូលរួមរបស់សប្បុរសជនដើម្បីជួយចែករំលែកដល់បងប្អូនមានជីវភាពខ្វះខាត និងជនងាយរងគ្រោះដែលកំពុងជួបការលំបាកពិតប្រាកដនៅតាមបណ្ដាមូលដ្ឋាន ក្នុងគោលដៅចូលរួមក្នុងការងារសង្គមជាមួយរាជរដ្ឋាភិបាល ដើម្បីជួយសម្រួលដល់បងប្អូនប្រជាពលរដ្ឋដែលមានការខ្វះខាត។ លោកស្រីក៏បានក្រើនរំលឹកដល់បងប្អូនប្រជាពលរដ្ឋឱ្យយកចិត្តទុកដាក់ខ្ពស់ចំពោះការធ្វើអនាម័យបរិស្ថានក្នុងការរស់នៅប្រចាំថ្ងៃ ព្រោះបរិស្ថាន និងអនាម័យសំខាន់សម្រាប់សុខភាព ព្រោះការរៀបចំទុកដាក់សំរាមបានត្រឹមត្រូវ នឹងធ្វើឱ្យទីក្រុងមានភាពស្រស់ស្អាត ដែលអាចទាក់ទាញអ្នកទេសចរចូលមកលេងកម្សាន្តកាន់តែច្រើន៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
