បើតាមមន្ត្រីជំនាញសុខាភិបាល បានបញ្ជាក់ថា ការបំបៅកូនដោយទឹកដោះម្ដាយ ជាកត្តាជួយធ្វើឱ្យប្រសើរឡើងនូវអត្រារស់រានមានជីវិតរបស់កុមារ ជួយការពារប្រឆាំងនឹងជំងឺដែលគំរាមកំហែងដល់អាយុជីវិត និងជំងឺរ៉ាំរ៉ៃផ្សេងៗទៀត ហើយវាក៏ជួយលើកកម្ពស់ការលូតលាស់របស់កុមារប្រកបដោយសុខភាពល្អ និងការអភិវឌ្ឍតាំងពីតូចផងដែរ។
លោកស្រី ធឿន សោភារី មន្ត្រីកម្មវិធីអាហារូបត្ថម្ភ នៃមន្ទីរសុខាភិបាលខេត្តសៀមរាប បានឱ្យដឹងថា ទារកដែលមានអាយុចាប់ពី ៦ខែឡើងទៅ មិនត្រឹមតែត្រូវការទឹកដោះម្ដាយតែមួយមុខនោះទេ គឺពួកគេត្រូវការអាហារបន្ថែម ដែលហៅថា បបរខាប់គ្រប់គ្រឿង ដើម្បីផ្ដល់នូវជីវជាតិគ្រប់គ្រាន់សម្រាប់ទ្រទ្រង់សុខភាព ដោយហេតុថា ក្នុងអំឡុងពេលនោះ ទឹកដោះម្ដាយគឺមិនមានសារធាតុចិញ្ចឹមគ្រប់គ្រាន់នោះទេ។
លោកស្រីបានឱ្យដឹងទៀតថា ក្រសួងសុខាភិបាល និងអង្គការសុខភាពពិភពលោក តែងតែធ្វើការលើកទឹកចិត្ត និងអប់រំណែនាំដល់ស្ត្រីជាម្ដាយ ត្រូវផ្ដល់នូវអាហារបន្ថែមដែលមានសារធាតុចិញ្ចឹមគ្រប់គ្រាន់សម្រាប់ទារកអាយុចាប់ពី ៦ខែឡើងនេះ ដើម្បីបំពេញតម្រូវការអាហារូបត្ថម្ភ ខណៈបច្ចុប្បន្នអត្រានៃការបំបៅកូនដោយទឹកដោះម្ដាយមានការថយចុះ។ បញ្ហានេះទាមទារឱ្យអាណាព្យាបាលគិតគូរពីតម្រូវការអាហារូបត្ថម្ភសម្រាប់ទារក ដើម្បីបំពេញបន្ថែមនូវសារធាតុដែលទារកត្រូវការ។
សូមបញ្ជាក់ថា តាមការអង្កេតវិទ្យាសាស្ត្ររយៈពេល ៥ឆ្នាំម្ដង បានរកឃើញថា ក្នុងឆ្នាំ២០១០ ស្ត្រីជាម្ដាយបានធ្វើការបំបៅដោះកូននឹងទឹកដោះមានចំនួន ៦៥%, ឆ្នាំ២០១៥ មានចំនួន ៦២% ខណៈក្នុងឆ្នាំ២០២១-២០២២ ស្ត្រីបំបៅកូនដោយទឹកដោះមានចំនួន ៥២%។ ចំនួននេះបានធ្វើឱ្យទារកប្រឈមនឹងកង្វះអាហារូបត្ថម្ភ ដែលនាំឱ្យទារកងាយឆ្លងជំងឺផ្សេងៗ៕
អត្ថបទ៖ លោកស្រី ហែម បូរ៉ាន្នី
កែសម្រួល៖ លោក អ៊ុន ណារាជ្យ
