ក្នុងកិច្ចប្រជុំបូកសរុបលទ្ធផលការងាររយៈពេល ២ខែ និងដាក់ចេញនូវផែនការបន្ត នៅរសៀលថ្ងៃទី១៨ ខែសីហា ឆ្នាំ២០២៥ លោក យឿន ចាន់ អនុប្រធានមន្ទីរព័ត៌មានខេត្តសៀមរាបទទួលបន្ទុករួម បានណែនាំដល់មន្ត្រីទាំងអស់ចំណុះឱ្យការិយាល័យទាំង៥ ត្រូវបន្តពង្រឹងការអនុវត្តការងារស្នូលរបស់ខ្លួនតាមជំនាញឱ្យបានល្អប្រសើរ ធ្វើយ៉ាងណាតាមឱ្យទាន់សភាពការណ៍សង្គមជាតិ ជាពិសេសបន្តយកចិត្តទុកដាក់លើការគ្រប់គ្រងការងារសាធារណៈមតិ ឱ្យកាន់តែល្អប្រសើរឡើង។
លោក យឿន ចាន់ មានប្រសាសន៍ថា យោងតាមរបាយការណ៍លទ្ធផលការងារដែលបានអនុវត្តកន្លងមក លោកសូមវាយតម្លៃខ្ពស់ចំពោះការខិតខំបំពេញតួនាទីភារកិច្ចរបស់មន្ត្រីទាំងអស់ ដោយឈរលើស្មារតីរួម ក្នុងការអនុវត្តការងារប្រកបដោយផ្លែផ្កាជូនថ្នាក់ដឹកនាំ និងសង្គមជាតិជារួម ហើយនិយាយដោយឡែកសម្រាប់រដ្ឋបាលខេត្ត និងអាជ្ញាធរក្រុងស្រុកទូទាំងខេត្តសៀមរាប គឺក្រោមការសហការ និងទំនាក់ទំនងល្អ។ ទោះជាយ៉ាងណាក៏ដោយ យើងនៅមានចំណុចខ្វះខាតមួយចំនួនដែលទាមទារឱ្យថ្នាក់ដឹកនាំ និងមន្ត្រីទាំងអស់ត្រូវយកចិត្តទុកដាក់ក្នុងការអនុវត្តតួនាទីភារកិច្ច ដោយត្រូវមានទំនួលខុសត្រូវឱ្យបានច្បាស់លាស់លើការងាររបស់ខ្លួន ហើយត្រូវបន្តអនុវត្តគោលការណ៍អ្នកចេះខ្លាំងបង្រៀនអ្នកចេះតិច អ្នកចេះតិចបង្រៀនអ្នកមិនទាន់ចេះសោះ។
លោកអនុប្រធានមន្ទីរបានបន្តថា ការអនុវត្តការងារប្រចាំថ្ងៃរបស់មន្ទីរព័ត៌មានខេត្តសៀមរាប ផ្ដោតសំខាន់លើការផ្សព្វផ្សាយព័ត៌មាន។ មន្ទីរនឹងរៀបចំឱ្យមន្ត្រីដែលមានបទពិសោធន៍ក្នុងការផលិតព័ត៌មាន និងការងារពាក់ព័ន្ធនឹងវិស័យព័ត៌មាន ដើម្បីចែករំលែកបទពិសោធន៍បន្ថែមទៀត និងបង្កើនសមត្ថភាពមន្ត្រី ឱ្យស្របតាមបរិបទនៃសង្គមរីកចម្រើន។ ដោយឡែកសម្រាប់ខេត្តសៀមរាបផ្ទាល់ ជាខេត្តដែលមានភាពមមាញឹកខ្លាំងបន្ទាប់ពីរាជធានីភ្នំពេញ ក្នុងការរៀបចំកិច្ចប្រជុំ និងព្រឹត្តិការណ៍សំខាន់ៗជាច្រើន ដូច្នេះយើងត្រូវយកចិត្តទុកដាក់លើការពង្រឹងសមត្ថភាពមន្ត្រីបន្ថែមទៀត ដើម្បីឱ្យមានភាពសកម្ម និងស្របតាមតម្រូវការនៃវិស័យព័ត៌មាន។
លោកក៏បានសង្កត់ធ្ងន់ថា ស្របនឹងការងារព័ត៌មាននេះ ការងារសាធារណៈមតិក៏នៅតែជាការងារស្នូលដ៏សំខាន់ផងដែរ ដែលទាមទារឱ្យមន្ត្រីពាក់ព័ន្ធក្នុងនាមជាសេនាធិការឱ្យរដ្ឋបាលខេត្ត រួមគ្នាយកចិត្តទុកដាក់តាមដាន និងអង្កេត ធ្វើយ៉ាងណាបង្កើនកិច្ចសហការក្នុងការប្រមូល និងឆ្លើយតបឱ្យបានលឿនទាន់ពេលវេលា ដើម្បីបង្កើនភាពទុកចិត្តដល់ប្រជាពលរដ្ឋមកលើរាជរដ្ឋាភិបាល និងអាជ្ញាធរខេត្ត៕
អត្ថបទ៖ លោក អ៊ុន ណារាជ្យ
រូបភាព៖ មន្ត្រីមន្ទីរ
