នៅថ្ងៃទី២០ ខែសីហា ឆ្នាំ២០២៥ ឯកឧត្តម អែល សៀត សមាជិកក្រុមប្រឹក្សាខេត្ត និងជាអនុប្រធានសាសនាឥស្លាមខេត្តសៀមរាប រួមជាមួយសប្បុរសជនខ្មែរឥស្លាមក្នុងខេត្ត បានប្រគល់ម៉ូតូថ្មីចំនួន ៣គ្រឿង ព្រមទាំងស្បៀងអាហារ និងថវិកាមួយចំនួនជូនដល់វីរកងទ័ព ៣រូប ដែលកំពុងឈរជើងការពារបូរណភាពទឹកដី តាមបណ្តោយព្រំដែនកម្ពុជា-ថៃ។
ឯកឧត្តម អែល សៀត បានឱ្យដឹងថា ម៉ូតូទាំង ៣គ្រឿងនេះ គឺជាអំណោយរបស់សប្បុរសជន ឈ្មោះ ហាជី ម៉ាត់ កូប និងក្រុមគ្រួសារ រស់នៅភូមិស្ទឹងថ្មី ដែលមានបេះដូងខ្មែរស្រឡាញ់ខ្មែរ ក្នុងជាតិសាសន៍តែមួយ ហើយការចូលរួមនេះក៏ជាការជួយលើកទឹកចិត្តដល់កងទ័ពជួរមុខដែលកំពុងឈរជើងការពារទឹកដីជូនប្រជាជនកម្ពុជាទាំងអស់គ្នាផងដែរ។ ឯកឧត្តមបន្តថា ក្រៅពីម៉ូតូ ក៏មានសប្បុរសជនខ្មែរឥស្លាមជាច្រើននាក់ទៀត បានចូលរួមបរិច្ចាគគ្រឿងឧបភោគបរិភោគ និងថវិកាតាមរយៈឯកឧត្តមផ្ទាល់ ដើម្បីយកទៅជូនដល់វីរកងទ័ព ដែលកំពុងការពារទឹកដីនៅសមរភូមិជួរមុខ។
ក្នុងនាមជាថ្នាក់ដឹកនាំសាសនាឥស្លាមខេត្តសៀមរាប ឯកឧត្តម បានថ្លែងអំណរគុណយ៉ាងជ្រាលជ្រៅដល់លោក ហាជី ម៉ាត់ កូប និងក្រុមគ្រួសារ រួមនឹងសប្បុរសជនខ្មែរឥស្លាមទាំងអស់ ដែលបានចូលរួមគាំទ្រ និងបង្ហាញពីស្មារតីសាមគ្គីភាពខ្មែរជួយខ្មែរក្នុងគ្រាលំបាក និងសូមប្រសិទ្ធពរជ័យនូវឥស្លាមបួនប្រការ គឺសុខស្លាម៉ាត់ ចម្រើនប៉ារ៉ាកាត់ ករណារ៉ស់ម៉ាត់ អាហ្វីយ៉ាត់ អំពីអល់ឡោះ ជូនដល់សប្បុរសជនទាំងអស់ផងដែរ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
