មន្ត្រីជំនាញបេតិកភណ្ឌបានបញ្ជាក់ថា រាជរដ្ឋាភិបាលកម្ពុជា បានខិតខំបញ្ចូលនូវសម្បត្តិវប្បធម៌ខ្មែរជាច្រើន ទៅក្នុងសម្បត្តិបេតិកភណ្ឌនៃអង្គការយូណេស្កូ ក្នុងគោលបំណងលើកកម្ពស់ និងការពារតម្លៃលេចធ្លោជាសកលរបស់តំបន់វប្បធម៌ ប្រវត្តិសាស្ត្រ និងធម្មជាតិ ដូច្នេះប្រជាពលរដ្ឋខ្មែរគ្រប់រូបមានតួនាទី និងភារកិច្ចសំខាន់ណាស់ក្នុងការចូលរួមលើកស្ទួយ ថែរក្សា អភិរក្ស និងការពារសម្បត្តិវប្បធម៌ទាំងនោះ ឱ្យបានគង់វង្សតាមលទ្ធភាពដែលអាចធ្វើទៅបាន។
ក្នុងកម្មវិធីសន្ទនាមតិនៅថ្ងៃទី១៩ ខែសីហានេះ លោក មាស ឫទ្ធីរ៉ាថេត មន្ត្រីការិយាល័យបេតិកភណ្ឌនៃមន្ទីរវប្បធម៌ និងវិចិត្រសិល្បៈខេត្តសៀមរាប បានបង្ហាញថា សម្បត្តិវប្បធម៌ជាតិ សំដៅលើសម្បត្តិទាំងឡាយណាដែលបានបន្សល់ទុកតាំងពីដូនតាមកដល់កូនចៅជំនាន់ក្រោយ ដើម្បីបន្តចូលរួមអភិរក្ស សិក្សាស្វែងយល់ និងថែរក្សាឱ្យបានគង់វង្សតជំនាន់ទៅមុខ។ លោកថា សម្បត្តិបេតិកភណ្ឌរបស់កម្ពុជាចែកជាពីរគឺ៖ បេតិកភណ្ឌរូបី ដែលសំដៅលើរបស់ដែលអាចមើលឃើញ និងប៉ះពាល់បាន និងបេតិកភណ្ឌអរូបី សំដៅលើចំណេះដឹងដែលទទួលបានតៗគ្នាពីមួយជំនាន់ទៅមួយជំនាន់ ដូចជារបាំ ឬសិល្បៈជាដើម។
លោកបានបន្ថែមថា មន្ទីរវប្បធម៌ និងវិចិត្រសិល្បៈខេត្ត ដែលជាសេនាធិការរបស់រដ្ឋបាលខេត្តសៀមរាប ក៏បានធ្វើការផ្សព្វផ្សាយតាមគ្រប់រូបភាព ជាពិសេសបង្កើតព្រឹត្តិការណ៍តូចធំនានា ដើម្បីបង្ហាញដល់សាធារណជន ឱ្យចូលរួមយល់ដឹងពាក់ព័ន្ធនឹងវប្បធម៌ជាតិរបស់ខ្លួន។ ការធ្វើបែបនេះមានគោលបំណងចម្បងសម្រាប់យុវវ័យ ដើម្បីឱ្យពួកគេយល់ច្បាស់នូវអ្វីដែលជាសម្បត្តិរបស់ខ្លួន និងជៀសវាងការភ័ន្តច្រឡំជាមួយវប្បធម៌បរទេស៕
អត្ថបទ៖ លោកស្រី ហែម បូរ៉ាន្នី
កែសម្រួល៖ លោក អ៊ុន ណារាជ្យ
