មជ្ឈមណ្ឌលការងារខេត្តសៀមរាប នៃទីភ្នាក់ងារជាតិមុខរបរ និងការងារ នៃក្រសួងការងារ និងបណ្ដុះបណ្ដាលវិជ្ជាជីវៈ កាលពីថ្ងៃទី២២ ខែសីហា ឆ្នាំ២០២៥ បានប្រកាសពីការផ្ដល់ឱកាសការងារជាង ៣០០កន្លែង នៅក្នុងខេត្តសៀមរាប ជូនប្រជាពលរដ្ឋ ជាពិសេសប្រជាពលរដ្ឋដែលទើបវិលត្រឡប់មកពីប្រទេសថៃ តាមរយៈការចុះឈ្មោះរៀនជំនាញ និងរកការងារធ្វើដោយស្របច្បាប់។
លោក សៀង សុខុន ប្រធានមជ្ឈមណ្ឌលការងារខេត្តសៀមរាប បានឱ្យដឹងថា ក្នុងន័យជំរុញឱកាសការងារឱ្យកាន់តែជិតប្រជាពលរដ្ឋ ក្រសួងការងារបានបង្កើតវេទិកាការងារផ្សព្វផ្សាយពីឱកាសការងារ ចាប់តាំងពីថ្ងៃទី២០ ខែសីហាមក ដើម្បីផ្ដល់ឱកាសការងារ ក៏ដូចជាឱកាសរៀនជំនាញដល់ប្រជាពលរដ្ឋ ជាពិសេសប្រជាពលរដ្ឋដែលទើបត្រឡប់មកពីប្រទេសថៃ ឱ្យពួកគាត់មានការងារធ្វើគ្រប់ៗគ្នា ដើម្បីសម្រួលដល់ជីវភាពគ្រួសាររបស់ពួកគាត់។ បច្ចុប្បន្ននេះ នៅខេត្តសៀមរាប មានការងារជាង ៣០០កន្លែង និងជាច្រើនកន្លែងទៀតនៅតាមបណ្ដាខេត្តដែលនៅជាប់ខេត្តសៀមរាប។
លោក សៀង សុខុន បានឱ្យដឹងទៀតថា ប្រជាពលរដ្ឋក្រីក្រ និងពលរដ្ឋដែលទើបត្រឡប់មកពីប្រទេសថៃ អាចទៅដាក់ពាក្យធ្វើការងារ និងរៀនជំនាញ នៅវិទ្យាស្ថានជាតិពហុបច្ចេកទេសភូមិភាគតេជោសែនសៀមរាប ដែលមានក្រុមការងារចាំទទួល និងសម្របសម្រួលនៅទីនោះជារៀងរាល់ថ្ងៃ។ លោកថា ការចុះឈ្មោះចូលរៀនជំនាញវិជ្ជាជីវៈ C1 នឹងទទួលបានប្រាក់ឧបត្ថម្ភ ២៨ម៉ឺនរៀលក្នុងមួយខែ សម្រាប់ប្រជាពលរដ្ឋក្រីក្រ និងប្រជាពលរដ្ឋដែលទើបមកពីប្រទេសថៃ ដែលមានបណ្ណក្រីក្រ និងបណ្ណមូលនិធិសមធម៌ ប៉ុន្តែអ្នកគ្មានបណ្ណក៏អាចចូលរៀនបានដែរ។
បើតាមលោកប្រធានមជ្ឈមណ្ឌលការងារ បានឱ្យដឹងទៀតថា តាមរយៈបង្កើតវេទិកាការងារផ្សព្វផ្សាយ ចាប់តាំងពីថ្ងៃទី២០ ខែសីហា មកដល់ពេលនេះ មានពលរដ្ឋដែលទើបវិលត្រឡប់មកពីប្រទេសថៃ បានចុះឈ្មោះរៀនជំនាញ និងធ្វើការងារចំនួន ៣៩នាក់ ក្នុងនោះ ៩នាក់មានការងារធ្វើ និងអ្នករៀនជំនាញចំនួន ៣០នាក់៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
