បងប្អូនជនភៀសសឹក និងប្រជាពលរដ្ឋមានជីវភាពខ្វះខាតចំនួន ១០០គ្រួសារ រស់នៅក្នុងឃុំសំរោង ស្រុកសូទ្រនិគម ខេត្តសៀមរាប កាលពីរសៀលថ្ងៃទី២៤ ខែសីហា ឆ្នាំ២០២៥ បានទទួលអំណោយជាស្បៀងអាហារពីមន្ត្រីសង្ឃខេត្តសៀមរាប និងសប្បុរសជន ដើម្បីជួយសម្រួលដល់ជីវភាពប្រចាំថ្ងៃ។
ឯកឧត្តម ហឿន សំនៀង អគ្គលេខាធិការរងនិងជាប្រធានក្រុមអ្នកពាក្យក្រុមប្រឹក្សាអភិវឌ្ឍន៍កម្ពុជា បានបង្ហាញថា ស្បៀងអាហារទាំងនេះទោះបីវាមិនច្រើន តែជាទឹកចិត្តមនុស្សធម៌ជួយគ្នាក្នុងគ្រាលំបាក ដោយចេញពីចិត្តរបស់យើងទាំងអស់គ្នា ព្រោះក្នុងដំណាក់កាលនេះប្រទេសជាតិយើងជួបបញ្ហាដោយមានការឈ្លានពានពីយោធាប្រទេសថៃ។ ដូចនេះ ទាំងរាជរដ្ឋាភិបាល ព្រះសង្ឃ ក៏ដូចជាប្រជាពលរដ្ឋទូទាំងប្រទេសកំពុងតែខ្វល់ខ្វាយ និងរួបរួមសាមគ្គីគ្នាជាធ្លុងមួយ ក្នុងការការពារទឹកដីរបស់យើង។
ឯកឧត្តម បានជំរុញឱ្យបងប្អូនត្រូវតែរួបរួមសាមគ្គី ដើម្បីធ្វើឱ្យប្រទេសយើងខ្លាំងទើបពុំមានអ្នកណាហានធ្វើបាបយើង។ ដើម្បីរួមចំណែកធ្វើឱ្យប្រទេសយើងខ្លាំងបាននាពេលអនាគត ប្រជាពលរដ្ឋខ្មែរ ត្រូវជំរុញកូនទៅរៀនឱ្យបានច្រើនមានចំណេះដឹងខ្ពស់ មកចូលរួមអភិវឌ្ឍន៍ប្រទេសយើង ខ្មែរសាមគ្គី ខ្មែរខ្លាំង។ ចំពោះការផ្ដល់ជូនស្បៀងអាហារនៅពេលនេះ មិនមែនដោយសាររាជរដ្ឋាភិបាលខ្វះខាតនោះទេ តែជាការចូលរួមជួយឧបត្ថម្ភបន្ថែមក្នុងស្មារតីខ្មែររួបរួមសាមគ្គីគ្នា ជួយគ្នាក្នុងគ្រាលំបាក។
ឯកឧត្តម ក៏សូមថ្លែងអំណរគុណដល់សប្បុរសជនទាំងអស់ ដែលមានស្មារតីស្រឡាញ់ជាតិ ដោយបានចូលរួមឧបត្ថម្ភគ្រឿងឧបភោគបរិភោគ និងថវិកា ដើម្បីគាំទ្រដល់សមរភូមិជួរមុខ ដោយទឹកចិត្តស្មោះសរក្នុងការរួបរួមជាតិខ្មែរជាធ្លុងមួយ ដោយស្មារតីខ្មែរជួយខ្មែរក្នុងគ្រាលំបាក៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
