ក្នុងឱកាសអញ្ជើញជាអធិបតីបើកសិក្ខាសាលាស្តីពីឌីជីថលូបនីយកម្មក្នុងរដ្ឋបាលសាធារណៈសម្រាប់ប្រទេសសមាជិកអាស៊ាន និងប្រទេសទីម័រឡេស្តេ នៅខេត្តសៀមរាប នាថ្ងៃទី២៦ ខែសីហានេះ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានមានប្រសាសន៍ថា ស្ថិតក្នុងបរិយាកាសដែលបច្ចេកវិទ្យាឌីជីថលកំពុងបោះជំហានយ៉ាងលឿនឥតឈប់ឈរ និងគ្របដណ្តប់ស្ទើរគ្រប់ទិដ្ឋភាពនៃជីវិតរស់នៅ កម្ពុជាក៏ដូចជាពិភពលោកបានមើលឃើញយ៉ាងច្បាស់ពីសក្តានុពលនៃបច្ចេកវិទ្យា ដែលកាន់តែដើរតួនាទីចាំបាច់នៅក្នុងការពង្រឹងភាពក្នុងការអភិវឌ្ឍសង្គម-សេដ្ឋកិច្ច។
ឯកឧត្តមឧបនាយករដ្ឋមន្ត្រី ហ៊ុន ម៉ានី មានប្រសាសន៍បន្តថា ក្នុងបរិបទប្រែប្រួលយ៉ាងឆាប់រហ័ស និងពិបាកព្យាករណ៍នៃបរិស្ថានសង្គម-សេដ្ឋកិច្ចនៃសន្តិសុខសាកល ដែលបច្ចុប្បន្នកំពុងបន្តរងឥទ្ធិពលភាពតានតឹងនៃភូមិសាស្ត្រនយោបាយ និងការធ្លាក់ចុះសេដ្ឋកិច្ចសាកល និងការបន្តមានជម្លោះនៅតាមតំបន់មួយចំនួនជាបន្តបន្ទាប់ បានគំរាមកំហែងដល់សុខសន្តិភាព ស្ថិរភាព និងវិបុលភាពរបស់ប្រជាជនទូទាំងពិភពលោក។ នៅក្នុងដំណាក់កាលដែលប្រជាជាតិនីមួយៗកំពុងខិតខំប្រឹងប្រែងស្តារឡើងវិញនូវសង្គម-សេដ្ឋកិច្ចក្រោយវិបត្តិជំងឺកូវីដ១៩ កម្ពុជា ក៏ដូចជាប្រទេសក្នុងតំបន់ បានមើលឃើញច្បាស់ពីភាពចាំបាច់នៃការពង្រឹងសមត្ថភាពសេវាសាធារណៈ និងរួមគ្នាដោះស្រាយបញ្ហាប្រឈមក្នុងប្រទេសរៀងៗខ្លួនផង ក្នុងតំបន់ផង និងសាកលលោកផង។
ឯកឧត្តម ហ៊ុន ម៉ានី មានប្រសាសន៍ទៀតថា សក្តានុពលនៃបច្ចេកវិទ្យាកាន់តែដើរតួនាទីចាំបាច់នៅក្នុងការពង្រឹងភាពក្នុងការអភិវឌ្ឍសង្គម-សេដ្ឋកិច្ច និងធានានូវនិរន្តរភាពក្នុងការគ្រប់គ្រងរដ្ឋបាលសាធារណៈ ក៏ដូចជាការផ្តល់សេវារដ្ឋបាលសាធារណៈ ឲ្យកាន់តែឆាប់រហ័ស កាន់តែប្រសើរ និងកាន់តែមានប្រសិទ្ធភាពខ្ពស់ ឆ្លើយតបទៅនឹងតម្រូវការ និងការរំពឹងទុកកាន់តែខ្ពស់របស់ប្រជាពលរដ្ឋ។ ជាមួយនេះ ការកែទម្រង់របស់រដ្ឋបាលសាធារណៈ តាមរយៈការធ្វើបរិវត្តកម្មឌីជីថល ជាកិច្ចការដែលរាជរដ្ឋាភិបាលកម្ពុជាបានយកចិត្តទុកដាក់ឥតឈប់ឈរទាំងនីតិកាលមុនៗ ដែលដឹកនាំដោយសម្តេចតេជោ ដែលបច្ចុប្បន្នជាប្រធានព្រឹទ្ធសភា។ សម្រាប់រាជរដ្ឋាភិបាលនីតិកាលទី៧ ក៏បានដាក់ចេញនូវយុទ្ធសាស្ត្របញ្ចកោណ ដំណាក់កាលទី១ ជាមួយអាទិភាពគន្លឹះចំនួន៥ គឺមនុស្ស ផ្លូវ ទឹក ភ្លើង និងបច្ចេកវិទ្យា ជាពិសេសបច្ចេកវិទ្យាឌីជីថល ដែលជាមធ្យោបាយមួយដើម្បីលើកកម្ពស់ផលិតភាពសេដ្ឋកិច្ច និងរដ្ឋបាលសាធារណៈ។
សូមជម្រាបថា សិក្ខាសាលាស្តីពីឌីជីថលូបនីយកម្មក្នុងរដ្ឋបាលសាធារណៈសម្រាប់ប្រទេសសមាជិកអាស៊ាន និងប្រទេសទីម័រឡេស្តេ មានការអញ្ជើញចូលរួមពីសិក្ខាកាមនៃបណ្តាប្រទេសជាសមាជិកអាស៊ាន, ប្រទេសទីម័រខាងកើត, ប្រទេសជប៉ុន, ប្រទេសចិន, ប្រទេសកូរ៉េខាងត្បូង និងលេខាធិការដ្ឋានអាស៊ាន ព្រមទាំងមន្ត្រីរាជការតំណាងក្រសួងស្ថាប័ននៃព្រះរាជាណាចក្រកម្ពុជា និងមន្ត្រីពាក់ព័ន្ធផ្សេងទៀត ដោយផ្ទាល់ និងតាមប្រព័ន្ធអនឡាញផងដែរ៕
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
