មន្ត្រីជាន់ខ្ពស់ក្រសួងទេសចរណ៍បានលើកឡើងថា បច្ចុប្បន្នទេសចរណ៍មូស្លីមកំពុងក្លាយជាទីផ្សារអាទិភាពមួយក្នុងចំណោមទីផ្សារអាទិភាពដទៃទៀត ដែលរួមចំណែកជួយជំរុញដល់កំណើនទេសចរអន្តរជាតិមកទស្សនាកម្ពុជា។ ស្ថិតិបច្ចុប្បន្នប្រជាជនមូស្លីមទូទាំងសកលលោកមានចំនួនប្រមាណជិត ២ពាន់លាននាក់ ស្មើនឹងប្រមាណ ២៥ភាគរយនៃចំនួនប្រជាជនសរុបក្នុងសកលលោក។
ថ្លែងបើកវគ្គបណ្តុះបណ្តាលស្តីពីការទទួលបដិសណ្ឋារកិច្ចទេសចរមូស្លីម និងស្តង់ដាមូស្លីមហ្វ្រែនលីកម្ពុជា នៅថ្ងៃទី២៦ ខែសីហា នាខេត្តសៀមរាប ឯកឧត្តម កាទើ មហាំម៉ាត់ណោសស្រ៊ី រដ្ឋលេខាធិការក្រសួងទេសចរណ៍ បានថ្លែងថា កត្តាទាំងនេះបានបង្ហាញឱ្យឃើញពីកាលានុវត្តភាពកាន់តែប្រសើរឡើងសម្រាប់កម្ពុជាក្នុងការច្បាមយកឱកាស និងធ្វើពិពិធកម្មទីផ្សារទេសចរណ៍ ដើម្បីពង្រឹង និងពង្រីកសក្តានុពលវិស័យទេសចរណ៍កម្ពុជាឱ្យកាន់តែទូលំទូលាយ និងរីកចម្រើនប្រកបដោយចីរភាព បរិយាបន្ន និងភាពធន់ តាមរយៈការចាប់យកទីផ្សារទេសចរណ៍មូស្លីមមកបំពេញបន្ថែមទីផ្សារអន្តរជាតិដែលមានស្រាប់។
ឯកឧត្តមរដ្ឋលេខាធិការបានថ្លែងអំពាវនាវដល់គ្រប់អ្នកពាក់ព័ន្ធ បន្តការយកចិត្តទុកដាក់ និងពង្រឹងកិច្ចសហការកាន់តែល្អប្រសើរបន្ថែមទៀត លើការទទួលបដិសណ្ឋារកិច្ច និងការសម្របសម្រួលជូនភ្ញៀវទេសចរមូស្លីម។ ឯកឧត្តមក៏បានស្នើឱ្យសមាគមទេសចរណ៍ និងប្រតិបត្តិករក្នុងឧស្សាហកម្មទេសចរណ៍ មូលដ្ឋានអាជីវកម្មទេសចរណ៍ទាំងអស់ បន្តពង្រឹងគុណភាពសេវាកម្មរបស់ខ្លួនឱ្យមានគុណភាពកាន់តែល្អប្រសើរឡើងជាលំដាប់ ជាមួយនឹងការរក្សាបាននូវថ្លៃសមរម្យ និងពិនិត្យលទ្ធភាពបញ្ចូលសម្បទាគ្រប់គ្រាន់ក្នុងការទទួលទេសចរមូស្លីម ដែលជាតម្លៃបន្ថែមនៃការផ្តល់សេវាកម្មរបស់ខ្លួន។ ឯកឧត្តមក៏បានស្នើដល់មូលដ្ឋានអាជីវកម្មទេសចរណ៍ទាំងអស់ សូមចូលរួមគាំទ្រ និងផ្សព្វផ្សាយយុទ្ធនាការទស្សនាកម្ពុជានៅរដូវកាលបៃតង តាមរយៈការគាំទ្រដល់ដំណើរទស្សនកិច្ចសិក្សារបស់សិស្ស-និស្សិតនៅតាមបណ្តាគ្រឹះស្ថានសិក្សានានាផងដែរ។
លោក ង៉ូវ សេងកាក់ អភិបាលរងខេត្តសៀមរាប បានស្នើដល់អាជីវករ ប្រតិបត្តិករទេសចរណ៍ និងសហគមន៍ទេសចរណ៍ទាំងអស់ត្រូវមានការរៀបចំសម្រាប់ទេសចរណ៍មូស្លីមនៅក្នុងខេត្តសៀមរាបដែលមានដូចជា៖ សេវាកម្មម្ហូបអាហារ Halal Food ត្រូវមានដាក់សញ្ញា Halal យ៉ាងច្បាស់នៅលើម៉ឺនុយ ដែលនេះគឺជាការចាំបាច់, កន្លែងសូត្របួងសួង (Prayer Facilities)៖ អ្នកទេសចរមូស្លីមត្រូវការសូត្របួងសួងថ្ងៃត្រង់ (Dhuhr) និងសូត្របួងសួងពេលព្រឹក (Asr) នៅពេលពួកគេកំពុងទស្សនាកន្លែងផ្សេងៗ និង ការគោរពវប្បធម៌ និងសាសនា៖ បុគ្គលិក (ជាពិសេសមគ្គុទ្ទេសក៍ទេសចរណ៍ និងអ្នកបម្រើ) គួរតែមានចំណេះដឹងអំពីវប្បធម៌ និងទូទៅអំពីសាសនាឥស្លាម៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
