អាជ្ញាធរខេត្តសៀមរាប បានបង្ហាញថា ដំណើរការប្រឡងសញ្ញាបត្រមធ្យមសិក្សាទុតិយភូមិ សម្រាប់ថ្ងៃដំបូងនេះ នៅខេត្តសៀមរាប បានដំណើរការទៅដោយរលូន និងមានភាពល្អប្រសើរ ទាំងសណ្តាប់ធ្នាប់ និងរបៀបរៀបរយនៅតាមមណ្ឌលនីមួយៗ ក្រោមការយកចិត្តទុកដាក់ពីថ្នាក់ដឹកនាំ ក្រុមសហភាពសហព័ន្ធយុវជនកម្ពុជា និងក្រុមគណៈកម្មការមេប្រយោគ រួមទាំងមន្ត្រីអង្គភាពប្រឆាំងអំពើពុករលួយ។
ក្នុងឱកាសអញ្ជើញបើកវិញ្ញាសាប្រឡង នាថ្ងៃទី២៨ ខែសីហា ឆ្នាំ២០២៥ នេះ ឯកឧត្តម ប្រាក់ សោភ័ណ អភិបាលខេត្តសៀមរាប បានមានប្រសាសន៍ថា ការប្រឡងនាពេលនេះ ជាការវាស់ស្ទង់នូវកម្រិតនៃចំណេះដឹងដែលប្អូនៗបានបញ្ចប់ការសិក្សានៅមធ្យមសិក្សាទុតិយភូមិ និងឈានចូលទៅសិក្សាបន្តនៅមហាវិទ្យាល័យ ឬសាកលវិទ្យាល័យ។ ក្នុងន័យនេះ សូមប្អូនបេក្ខជនគោរពឱ្យបាននូវវិន័យផ្ទៃក្នុងនៅពេលប្រឡងឱ្យបានល្អ ដើម្បីធានានូវគុណភាពនៃការបណ្តុះបណ្តាលធនធានមនុស្ស ដែលបេក្ខជនទាំងអស់ដែលប្រឡងនាពេលនេះ គឺគ្រប់គ្នាជាទំពាំងស្នងឫស្សីនៃប្រទេសជាតិទៅថ្ងៃអនាគត។
ឯកឧត្តម ប្រាក់ សោភ័ណ ក៏បានជំរុញលើកទឹកចិត្តដល់បេក្ខជនទាំងអស់ឱ្យប្រឹងប្រែងអស់ពីសមត្ថភាព និងគោរពវិន័យលក្ខខណ្ឌកំណត់ និងបម្រាមទាំងឡាយរបស់ក្រសួងអប់រំ ព្រមទាំងគោរព និងស្តាប់តាមការណែនាំរបស់អនុរក្ស ចៀសវាងប្រព្រឹត្តផ្ទុយពីនេះ។ ជាពិសេស ក្នុងការបើកបរមកប្រឡង ត្រូវរក្សាសុវត្ថិភាព និងប្រុងប្រយ័ត្នក្នុងការបើកបរយានយន្តឱ្យបានជាប្រចាំ។
សូមជម្រាបថា សម្រាប់ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ២៨ សីហា ២០២៥ នៅខេត្តសៀមរាប មានបេក្ខជនដាក់ពាក្យសរុប ១១.១៦២ នាក់ និងមានមណ្ឌលប្រឡងចំនួន ១៦ មណ្ឌល ស្មើនឹង ៤៤៩ បន្ទប់៕
អត្ថបទ និងរូបភាព÷ មន្ត្រីមន្ទីរ
កែសម្រួល÷ លោក អ៊ុន ណារាជ្យ
