នៅថ្ងៃទី២៦ ខែសីហា ឆ្នាំ២០២៥នេះ មន្ត្រីពាក់ព័ន្ធក្នុងខេត្តសៀមរាប និងអង្គការដៃគូ បានទទួលការបណ្ដុះបណ្ដាលពង្រឹងសមត្ថភាពលើការអនុវត្តតួនាទី ភារកិច្ច ការរៀបចំរបាយការណ៍ និងការគ្រប់គ្រងស្ថិតិពលករចំណាក-ចំណូលស្រុក ដែលរៀបចំឡើងដោយគណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប ហៅកាត់ គ.ខ.ប.ជ។
លោក ចឹក គឹមជុន អនុប្រធាន គ.ខ.ប.ជ មានប្រសាសន៍ថា វគ្គបណ្ដុះបណ្ដាលនេះ មិនត្រឹមតែផ្ដល់ចំណេះដឹងអំពីរចនាសម្ព័ន្ធ និងតួនាទីភារកិច្ចប៉ុណ្ណោះទេ ប៉ុន្តែថែមទាំងជួយលើកកម្ពស់សមត្ថភាពសមាជិកទាំងអស់ អាចអនុវត្តការងារប្រកបដោយប្រសិទ្ធភាព និងឆ្លើយតបបានតាមតម្រូវការពិតប្រាកដ។ ការចូលរួមក្នុងវគ្គនេះ នឹងជួយឱ្យសមាជិកមានជំនាញក្នុងការរៀបចំរបាយការណ៍លទ្ធផលការងារ ដើម្បីចូលរួមពង្រឹងប្រព័ន្ធរបាយការណ៍ប្រយុទ្ធប្រឆាំងអំពើជួញដូរមនុស្សឱ្យកាន់តែរឹងមាំ មានភាពសុក្រិត ត្រឹមត្រូវ និងប្រកបដោយប្រសិទ្ធភាព។
លោកបានជំរុញ និងសំណូមពរដល់មន្ត្រីពាក់ព័ន្ធទាំងអស់ ត្រូវយកចិត្តទុកដាក់ស្ដាប់តាមការបកស្រាយរបស់មន្ត្រីបង្គោល ចែករំលែកបទពិសោធទៅវិញទៅមក ហើយក្នុងករណីនៅមានចម្ងល់ ត្រូវហ៊ានសួរ ព្រោះនេះជាការបង្កើនចំណេះដឹងថ្មី ពង្រឹងសមត្ថភាពបន្ថែមនៅចំណុចខ្វះខាតក្នុងការអនុវត្តការងារប្រចាំថ្ងៃ ស្របទៅតាមបរិបទសង្គមបច្ចុប្បន្នមានចំនួនពលករចេញ-ចូលក្នុងចំនួនច្រើន ដែលទាមទារឱ្យមានការយកចិត្តទុកដាក់ខ្ពស់លើបញ្ហាទិន្នន័យនេះឱ្យបានហ្មត់ចត់។ នេះជាផ្នែកមួយក្នុងការចូលរួមចំណែកបង្ការ ទប់ស្កាត់បញ្ហារបស់ពលករបានក្នុងជំហានបន្តបន្ទាប់ប្រកបដោយភាពត្រឹមត្រូវ៕
អត្ថបទ និងរូបភាព៖ លោក ហេង វន្នី
កែសម្រួល៖ លោក អ៊ុន ណារាជ្យ
