កាលពីរសៀលថ្ងៃទី២៤ ខែសីហា ឆ្នាំ២០២៥ ព្រះសង្ឃ និងប្រជាពលរដ្ឋក្នុងខេត្តសៀមរាប ដឹកនាំដោយ ព្រះគ្រូ សាន សប្បាយ ចៅអធិការវត្តវិសុទ្ធិមគ្គ ក្នុងស្រុកអង្គរធំ បាននាំយកអំណោយជាគ្រឿងឧបភោគបរិភោគ ផ្តល់ជូនដល់វីរកងទ័ពជួរមុខ ដែលកំពុងឈរជើងការពារបូរណភាពទឹកដី ក្នុងភូមិសាស្ត្រខេត្តឧត្ដរមានជ័យ។
ព្រះគ្រូ សាន សប្បាយ មានសង្ឃដីកាថា ក្នុងស្មារតីខ្មែររួបរួមសាមគ្គីគ្នា លើកទឹកចិត្តដល់បងប្អូនកងទ័ពដែលកំពុងឈរជើងតាមបន្ទាត់ព្រំដែន ក្នុងការពារបូរណភាពទឹកដីរបស់កម្ពុជា ព្រះអង្គរួមទាំងពុទ្ធបរិស័ទ សប្បុរសជនខ្មែរ ក៏បាននាំយកថវិកា និងគ្រឿងឧបភោគបរិភោគមួយចំនួន មកប្រគល់ជូនពួកគាត់ ដើម្បីជួយសម្រួលទុក្ខលំបាកខ្លះៗជាមួយរដ្ឋាភិបាល។ ទោះបីជាការយកអំណោយទៅជូនកងទ័ពនៅឆ្ងាយខេត្តក្ដី ប៉ុន្តែជាទឹកចិត្ត ទឹកព្រះទ័យ ចូលរួមលើកទឹកចិត្តដល់កងទ័ព ហើយការផ្តល់ជូននូវសម្ភារទាំងនេះ មិនមែនថារាជរដ្ឋាភិបាលខ្វះខាតនោះទេ តែជាការចូលរួមជួយឧបត្ថម្ភបន្ថែម គឺបង្ហាញពីការសាមគ្គីភាពជួយគ្នាក្នុងគ្រាលំបាក។
ព្រះអង្គបានបន្ថែមថា យើងពិតជាមានមោទកភាពចំពោះវីរកងទ័ពយើង ដែលពោរពេញដោយឆន្ទៈ មនសិការ ស្មារតីក្លាហាន និងសេចក្តីស្មោះត្រង់ចំពោះជាតិ ដែលពួកគាត់បានលះបង់កាយចិត្ត គ្រួសារប្រពន្ធកូនជាទីស្រឡាញ់ សុខចិត្តយកទ្រូងពាំងគ្រាប់រំសេវ និងអាវុធគ្រប់ប្រភេទ ប្តូរយកសុខសន្តិភាពជូនប្រជាជនកម្ពុជាទាំងមូល ខណៈដែលប្រជាពលរដ្ឋរបស់យើងអាចសម្រាន្តលក់ ហូបឆ្ងាញ់ ប្រកបដោយស្នាមញញឹម និងភាពកក់ក្តៅជាមួយក្រុមគ្រួសារផងដែរ។ សូមឱ្យវីរកងទ័ព និងបួងសួងដល់បារមីវត្ថុស័ក្តិសិទ្ធិក្នុងទឹកដីអាណាចក្រខ្មែរ ឱ្យកងកម្លាំងគ្រប់ប្រភេទទទួលបាននូវជោគជ័យឈ្នះអស់ពីការឈ្លានពានរបស់សត្រូវ។
តំណាងឱ្យវីរកងទ័ព បានសម្ដែងការដឹងគុណដល់សប្បុរសជនជាច្រើន ទាំងក្នុងនិងនៅក្រៅប្រទេស ដែលតែងបាននាំយកអំណោយក៏ដូចជាស្បៀងអាហារជារៀងរាល់ថ្ងៃ ដល់កងកម្លាំងជួរមុខក្នុងខេត្តឧត្ដរមានជ័យ ដែលនេះបង្ហាញពីទឹកចិត្តដ៏ល្អរបស់ប្រជាជនខ្មែរ។ ពួកគាត់បានសម្ដែងការកោតស្ងប់ស្ងែង ដែលបានឃើញប្រជាពលរដ្ឋខ្លួន ចេះជួយគ្នាក្នុងគ្រាមានទុក្ខនេះ៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
