ថ្លែងក្នុងសិក្ខាសាលាពិគ្រោះយោបល់កម្រិតបច្ចេកទេស «ផែនការរៀបចំផ្លូវទស្សនាចរណ៍ និងកញ្ចប់ទស្សនកិច្ចទេសចរណ៍សម្រាប់ខេត្តសៀមរាប និងតំបន់ជុំវិញ» នៅថ្ងៃទី២៥ ខែសីហា ឆ្នាំ២០២៥ ឯកឧត្តម ណេប សាមុត រដ្ឋលេខាធិការទីស្តីការគណៈរដ្ឋមន្ត្រី បង្ហាញថា កម្ពុជាមានចក្ខុវិស័យប្រែក្លាយខ្សែទស្សនាចរណ៍អន្តរខេត្ត ជាចង្កោមគោលដៅទេសចរណ៍ស្នូល និងចម្បង ក្នុងការតភ្ជាប់តំបន់សៀមរាប-អង្គរ ទៅកាន់ខេត្តជុំវិញ ដូចជា កំពង់ធំ ព្រះវិហារ ឧត្តរមានជ័យ បន្ទាយមានជ័យ និងបាត់ដំបង ដើម្បីជំរុញចលនាទេសចរអន្តរជាតិ ទេសចរជាតិ និងជនបរទេសដែលកំពុងរស់នៅក្នុងកម្ពុជា។
ឯកឧត្តម ណេប សាមុត បញ្ជាក់ថា ចក្ខុវិស័យនេះ គឺស្របតាមប្រសាសន៍របស់សម្តេចធិបតី ហ៊ុន ម៉ាណែត នាយករដ្ឋមន្ត្រី គឺ «ប្រទាក់ក្រឡាទៅហើយ បើយើងប្រទាក់ក្រឡាទីផ្សារក្នុងស្រុកកាន់តែច្រើន យើងជំនួសការនាំចូល ឬពឹងផ្អែកទៅលើការនាំចូលទេសចរពីក្រៅកាន់តែច្រើន យើងបង្កើតច្រើន យើងម្ចាស់ការខ្លួនឯងបានច្រើន នេះគឺការឯករាជ្យភាពរបស់យើង មិនមែនបានន័យថា យើងឈប់ធ្វើទំនាក់ទំនងជាមួយប្រទេសផ្សេងទេ តែក្នុងស្រុករបស់យើងសក្តានុពលច្រើនណាស់ សូមភ្ជាប់ឱ្យច្រើន»។
ឯកឧត្តម បញ្ជាក់ទៀតថា នេះជាការជំរុញការប្រកួតប្រជែង ដើម្បីបែងចែកផលប្រយោជន៍រវាងគោលដៅទេសចរណ៍អន្តរខេត្ត តាមរយៈការបំពេញបន្ថែមភាពចម្រុះ និងភាពទាក់ទាញ រួមចំណែកដល់ការលើកកម្ពស់សេដ្ឋកិច្ចមូលដ្ឋាន ធ្វើឱ្យជីវភាពប្រជាពលរដ្ឋកាន់តែប្រសើរ និងរួមចំណែកដល់ការអភិវឌ្ឍ និងអភិរក្សធនធានវប្បធម៌ បេតិកភណ្ឌ និងធម្មជាតិ។ វិធានការគន្លឹះអភិវឌ្ឍន៍ទេសចរណ៍ខេត្តសៀមរាប ឆ្នាំ២០២៥ ដែលរាជរដ្ឋាភិបាលបានដាក់ចេញ គឺសិក្សារៀបចំ៖ ១. បង្កើតសៀគ្វីទេសចរណ៍បេតិកភណ្ឌពិភពលោក, ២. បង្កើតសៀគ្វីទេសចរណ៍ខេត្តសៀមរាបភ្ជាប់នឹងបណ្តាខេត្តជុំវិញ។ ពិសេសអនុវត្តតាមប្រសាសន៍សម្តេចធិបតី ក្រោមទម្រង់ជាដំណាក់កាល ជាជំហានៗ តាមរយៈអភិក្រម “ផ្ការីក” ហើយគំរូនៃការអភិវឌ្ឍគឺលំនាំតាម “គោលដៅស្នូល និងគោលដៅគាំទ្រ (Hub and Spokes)” ។
លោក យុន លីនណេ អភិបាលរងខេត្តសៀមរាប មានប្រសាសន៍ថា ខេត្តសៀមរាប ជាគោលដៅទេសចរណ៍សំខាន់របស់ប្រទេស មានសម្បត្តិធម្មជាតិ និងវប្បធម៌ប្រវត្តិសាស្ត្រ ដូច្នេះការមានប្រព័ន្ធគ្រប់គ្រងទិន្នន័យស្ថិតិដែលត្រឹមត្រូវ និងទាន់សម័យ គឺជាឧបករណ៍គាំទ្រសំខាន់សម្រាប់ការអភិវឌ្ឍយុទ្ធសាស្ត្រទេសចរណ៍ឱ្យមានប្រសិទ្ធភាព និងឆ្លងកាត់បញ្ហាប្រឈមនានាឱ្យទទួលបានជោគជ័យ ដូច្នេះតាមរយៈសិក្ខាសាលានេះលោកជឿជាក់ថា នឹងទទួលបាននូវធាតុចូលសំខាន់ៗជាច្រើនពីបងប្អូនសិក្ខាកាមទាំងអស់ ពិសេសបងប្អូនដែលអញ្ជើញមកពីក្រុមហ៊ុនទេសចរណ៍ដែលមានបទពិសោធន៍ច្រើនក្នុងការរៀបចំកញ្ចប់ទស្សនកិច្ចក្នុងខេត្តសៀមរាប ដែលនឹងផ្តល់នូវធាតុចូលចំណេះដឹងថ្មីៗ និងចែករំលែកនូវបទពិសោធន៍ដ៏មានតម្លៃ ជូនដល់ក្រុមការងារ ដើម្បីជាប្រយោជន៍រួមក្នុងការអភិវឌ្ឍន៍វិស័យទេសចរណ៍ខេត្តសៀមរាប ក៏ដូចជាជាតិទាំងមូល៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
