នៅរសៀលថ្ងៃទី២៣ ខែសីហា ឆ្នាំ២០២៥ ព្រះសង្ឃ លោកគ្រូអ្នកគ្រូ សិស្សានុសិស្ស និងប្រជាពលរដ្ឋយ៉ាងច្រើនកុះករ មកពីគ្រប់ទិសទី បាននាំគ្នាដើរក្បួនដង្ហែតាមផ្លូវមួយចំនួនក្នុងក្រុងសៀមរាប ដើម្បីអំពាវនាវដល់ប្រធានាធិបតីសហរដ្ឋអាមេរិក លោក Donald Trump ជំរុញឱ្យភាគីថៃដោះលែងកងទ័ពកម្ពុជាទាំង ១៨ នាក់ ដែលបានចាប់ខ្លួនក្រោយបទឈប់បាញ់ចូលជាធរមាន ឱ្យពួកគាត់ត្រឡប់មកកម្ពុជាវិញ។
ប្រជាពលរដ្ឋបានលើកឡើងថា ពួកគាត់ពិតជាមានក្ដីបារម្ភ និងឈឺចាប់ជាពន់ពេកដោយសារទាហានថៃ បាននឹងកំពុងឈ្លានពានអធិបតេយ្យភាពប្រទេសកម្ពុជា នៅតាមតំបន់ព្រំដែនយ៉ាងគគ្លើន បន្ទាប់ពីមានបទឈប់បាញ់កាលពីថ្ងៃទី២៨ ខែកក្កដា។ ក្រោយបទឈប់បាញ់បានចូលជាធរមានកាលពីថ្ងៃទី២៨ ខែកក្កដា ទាហានថៃបានចូលមកចាប់ទាហានកម្ពុជាចំនួន ២០ រូប នៅក្នុងដែនអធិបតេយ្យកម្ពុជា ហើយបានបញ្ជូនពីរនាក់មកវិញក្នុងស្ថានភាពមិនប្រក្រតី។ រហូតមកដល់ពេលនេះ កងទ័ពថៃនៅតែបន្តឃុំឃាំងកងទ័ពកម្ពុជា ១៨រូបទៀត ដោយមិនព្រមដោះលែង។
ប្រជាពលរដ្ឋកម្ពុជាទាមទារឱ្យភាគីថៃប្រគល់កងទ័ពកម្ពុជាទាំង ១៨ រូប នោះមកវិញជាដាច់ខាត។ មិនតែប៉ុណ្ណោះ ពួកគាត់ស្នើឱ្យថៃដកបន្លាលួស និងកង់ឡានចេញពីទឹកដីអធិបតេយ្យភាពកម្ពុជា នៅតាមខ្សែបន្ទាត់ព្រំដែន។ តាមរយៈនេះ ប្រជាជនកម្ពុជាសូមសំណូមពរដោយទទូចឱ្យលោកប្រធានាធិបតី Donald Trump មេត្តាដាក់សម្ពាធទៅលើរដ្ឋាភិបាលថៃដើម្បីដោះលែងកងទ័ពកម្ពុជាឱ្យត្រឡប់មកវិញដោយគ្មានលក្ខខណ្ឌ៕
អត្ថបទ និងរូបភាព៖ មន្ត្រីមន្ទីរ
កែសម្រួល៖ លោក អ៊ុន ណារាជ្យ
