ការលើកកម្ពស់ស្ត្រីក្នុងគ្រួសារ គឺជាផ្នែកមួយដ៏សំខាន់ដែលធ្វើឱ្យគ្រួសាររីកចម្រើនទៅមុខបាន ដោយក្នុងនោះរាជរដ្ឋាភិបាលកម្ពុជា បាននិងកំពុងយកចិត្តទុកដាក់ខ្ពស់ចំពោះស្ត្រី ជាពិសេសការផ្តល់ឱកាសឱ្យពួកគាត់អាចប្រកបរបរចិញ្ចឹមជីវិត ដើម្បីរកប្រាក់ចំណូលបន្ថែម ហើយក៏បានការលើកទឹកចិត្តឱ្យស្ត្រីរៀនជំនាញវិជ្ជាជីវៈ ដើម្បីជាទុនក្នុងការទទួលបានប្រាក់ចំណូល និងជួយលើកកម្ពស់សេដ្ឋកិច្ចគ្រួសារ។
ក្នុងកម្មវិធីយើងធ្វើបាន នាថ្ងៃទី២០ ខែសីហា ឆ្នាំ២០២៥ លោកស្រី សេម ណារី អនុប្រធានការិយាល័យសង្គមកិច្ច និងសុខុមាលភាពសង្គមស្រុកជីក្រែង ខេត្តសៀមរាប បានឱ្យដឹងថា បច្ចុប្បន្នអាជ្ញាធរស្រុក និងអង្គការដៃគូនានា បាននិងកំពុងជំរុញលើកទឹកចិត្តស្ត្រីក្នុងសហគមន៍ ជាពិសេសពលករជាស្រ្តីដែលទើបវិលត្រឡប់ពីប្រទេសថៃ ឱ្យពួកគាត់ចាប់យកជំនាញវិជ្ជាជីវៈ។ នេះដើម្បីឱ្យពួកគាត់មានជំនាញច្បាស់លាស់ ដែលអាចបង្កើតជាអាជីវកម្មខ្នាតតូច និងបង្កើនប្រាក់ចំណូលក្នុងគ្រួសារ។
លោកស្រី សេម ណារី បានបន្ថែមថា ចំពោះការផ្តល់ជំនាញនេះ អាជ្ញាធរពាក់ព័ន្ធរួមជាមួយអង្គការដៃគូ នឹងបំពេញបន្ថែមតាមចំណង់ចំណូលចិត្ត និងតម្រូវការរបស់ពួកគាត់។ កិច្ចការនេះនឹងជំរុញឱ្យពួកគាត់ជាស្ត្រីអាចរកប្រាក់ចំណូលផ្គត់ផ្គង់ក្រុមគ្រួសារបាន៕
អត្ថបទ៖ ហែម បូរ៉ាន្នី
កែសម្រួល៖ លោក អ៊ុន ណារាជ្យ
