អាជ្ញាធរខេត្តសៀមរាប បានអំពាវនាវដល់ប្រជាពលរដ្ឋគ្រប់សាសនានៅក្នុងប្រទេសកម្ពុជា រួមគ្នាជាធ្លុងមួយ បន្តគាំទ្រ និងលើកទឹកចិត្តដល់វីរភាពដ៏អង់អាចរបស់យុទ្ធជនជួរមុខយើងទាំងអស់ ដែលបាននឹងកំពុងបន្តឈរជើងការពារបូរណភាពទឹកដី ពីការឈ្លានពានរបស់ប្រទេសជិតខាង ក្រោមបទបញ្ជាដ៏អង់អាចម៉ឺងម៉ាត់របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។
ក្នុងឱកាសប្រារព្ធទិវាអន្តរជាតិសាសនាប្រឆាំងការជួញដូរមនុស្ស ២០ សីហា ២០២៥ ក្រោមប្រធានបទ “សុខដុមនីយកម្មសាសនានៅកម្ពុជា ជាសក្ដានុពលក្នុងការប្រឆាំងអំពើជួញដូរមនុស្សគ្រប់ទម្រង់នាសម័យបច្ចេកវិទ្យា” នារសៀលថ្ងៃទី២ ខែកញ្ញា លោកស្រី ម៉ននី រង្សី អភិបាលរងខេត្ត និងជាអនុប្រធានគណៈកម្មាធិការខេត្តប្រយុទ្ធប្រឆាំងអំពើជួញដូរមនុស្ស មានប្រសាសន៍ថា គោលបំណងនៃការប្រារព្ធទិវាជាតិនេះ គឺដើម្បីបង្ហាញការប្ដេជ្ញាចិត្តយ៉ាងមុតមាំឥតរាថយ និងកាន់តែស្វាហាប់របស់រាជរដ្ឋាភិបាល ដែលប្រឆាំងដាច់ខាតអំពើជួញដូរមនុស្សគ្រប់ទម្រង់ និងបទល្មើសឧក្រិដ្ឋដទៃទៀត ដែលបាននិងកំពុងបំផ្លាញដល់សង្គមជាតិយ៉ាងធ្ងន់ធ្ងរ។
លោកស្រី ម៉ននី រង្សី បន្តថា ទិវានេះដែរ ក៏ជាការបង្ហាញអំពីស្មារតី សាមគ្គី ឯកភាព និងសុខដុមនីយកម្ម នៃគ្រប់ជំនឿសាសនានៅក្នុងព្រះរាជាណាចក្រកម្ពុជា រួមគ្នាប្រឆាំងការជួញដូរមនុស្ស ធ្វើឱ្យមនុស្សទាំងឡាយមានសុវត្ថិភាព និងភាពរីករាយ ដែលរស់នៅលើទឹកដីកម្ពុជា។
លោកស្រីអភិបាលរងខេត្ត ក៏សូមថ្លែងអំណរគុណចំពោះថ្នាក់ដឹកនាំ និងសាសនិកគ្រប់និកាយសាសនាទាំងអស់ ដែលមានឆន្ទៈចូលរួមក្នុងសកម្មភាពនានា ក្នុងគោលដៅលើកកម្ពស់សុវត្ថិភាពសង្គម និងសូមបន្តផ្សព្វផ្សាយ ដល់បព្វជិត និងសាវក ជាសាសនិកជនរបស់ខ្លួនឱ្យបានជ្រួតជ្រាបកាន់តែច្បាស់អំពីអត្ថន័យ នៃទិវាជាតិអន្តរសាសនាប្រឆាំងការជួញដូរមនុស្សនៅកម្ពុជា និងសារៈសំខាន់នៃការអប់រំបែបសាសនា សម្រាប់សេចក្ដីថ្លៃថ្នូរ ភាពសុខុដុមរមនា និងការរីក ចម្រើន របស់យើងទាំងអស់គ្នា និងប្រទេសជាតិយើង៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
