អាជ្ញាធរខេត្តសៀមរាប បានលើកឡើងថា ឯកសារអត្រានុកូលដ្ឋានជាឯកសារសំខាន់ណាស់សម្រាប់ប្រជាពលរដ្ឋ សម្រាប់បំពេញបែបបទផ្សេងៗ ទាំងក្នុងការប្រកបមុខរបរ និងការងារ។ ដូច្នេះ ការផ្ដល់សេវាកាន់តែឆាប់រហ័សជូនប្រជាពលរដ្ឋ ជាការចូលរួមលើកកម្ពស់កម្រិតជីវភាពរបស់គាត់ស្របតាមគោលនយោបាយរបស់រាជរដ្ឋាភិបាលក្នុងការកាត់បន្ថយភាពក្រីក្រ។ កត្តានេះ ទាមទារឱ្យមន្ត្រីអត្រានុកូលដ្ឋាន ត្រូវខិតខំបម្រើសេវាជូនពលរដ្ឋឱ្យបានល្អប្រសើរ និងឆាប់រហ័ស។
នេះបើតាមការលើកឡើងរបស់ លោក សុខ ថុល អភិបាលរងខេត្តសៀមរាប ក្នុងពិធីបើកវគ្គបណ្តុះបណ្តាល វេទិកា និងទស្សនកិច្ចសិក្សាប្រចាំឆ្នាំ ស្ដីពីការរៀបចំ និងការអនុវត្តផែនការ និងថវិការដ្ឋបាលឃុំ/សង្កាត់ សម្រាប់អត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម នៅរដ្ឋបាលឃុំ/សង្កាត់ ខេត្តសៀមរាប នាថ្ងៃទី៣ ខែកញ្ញា ឆ្នាំ២០២៥នេះ។
លោក សុខ ថុល មានប្រសាសន៍ថា បច្ចុប្បន្នរាជរដ្ឋាភិបាលកម្ពុជា បានអនុវត្តការចុះបញ្ជីអត្រានុកូលដ្ឋានសាកល្បងតាមប្រព័ន្ធអនឡាញនៅខណ្ឌពោធិសែនជ័យ រាជធានីភ្នំពេញ។ ការដាក់អនុវត្តនេះ ជាការយកចិត្តទុកដាក់របស់រាជរដ្ឋាភិបាល ក្នុងការសម្រួលដល់ពលរដ្ឋក្នុងធ្វើដំណើរទៅស្វែងរកសេវា។ បើទោះជាយ៉ាងនេះក្ដី សម្រាប់នៅតាមបណ្ដាខេត្ត បានជួបប្រទះនូវបញ្ហាប្រឈមមួយចំនួន។ ជាក់ស្ដែងនៅខេត្តសៀមរាប ការចុះបញ្ជីអត្រានុកូលដ្ឋានតាមច្រកចេញចូលតែមួយតាមបណ្ដាក្រុងស្រុកមានចំនួនច្រើន តែមន្ត្រីមានចំនួនតិច ខ្វះខាតសម្ភារបច្ចេកទេសដូចជាកុំព្យូទ័រជាដើម។
លោកអភិបាលរងខេត្ត បញ្ជាក់ថា ទោះជាយើងមានបញ្ហាប្រឈមក្ដី អាជ្ញាធរខេត្តនៅតែខិតខំពង្រីកវិសាលភាពអនុវត្តបន្ថែមទៀត តាមលទ្ធភាពជាក់ស្ដែងចំពោះមុខ ដោយធ្វើយ៉ាងណាឱ្យការចុះបញ្ជីអត្រានុកូលដ្ឋានជូនប្រជាពលរដ្ឋឱ្យបានទាន់ពេលវេលា និងត្រឹមត្រូវតាមនីតិវិធី និងទទួលខុសត្រូវខ្ពស់ ចៀសវាងការមានកំហុសបច្ចេកទេស ឬការអាក់ខានណាមួយក្នុងការផ្ដល់ជូនប្រជាពលរដ្ឋ៕
អត្ថបទ និងរូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
