នាព្រឹកថ្ងៃទី៨ ខែកញ្ញា ឆ្នាំ២០២៥ ដែលជាថ្ងៃកាន់បិណ្ឌវេនទី១ នៃពិធីបុណ្យភ្ជុំបិណ្ឌ ឯកឧត្តម លី សំរិទ្ធ ប្រធានក្រុមប្រឹក្សាខេត្ត និងឯកឧត្តម ប្រាក់ សោភ័ណ អភិបាលខេត្តសៀមរាប បានដឹកនាំថ្នាក់ដឹកនាំខេត្ត មន្ទីរ-អង្គភាព និងមន្ត្រីរាជការ ចូលរួមកាន់បិណ្ឌជាមួយពុទ្ធបរិស័ទចំណុះជើងវត្តព្រះព្រហ្មរ័ត្ន និងវត្តកេសរារាម ក្នុងក្រុងសៀមរាប។
ឯកឧត្តម ប្រាក់ សោភ័ណ អភិបាលខេត្តសៀមរាប បានមានប្រសាសន៍ថា វិស័យអាណាចក្រ និងពុទ្ធចក្រនៅកម្ពុជា គឺដើរទន្ទឹមគ្នា ដែលមិនអាចខ្វះបានឡើយ។ ការរីកចម្រើននៃវិស័យព្រះពុទ្ធសាសនា គឺពឹងផ្អែកលើជីវភាពធូរធាររបស់ប្រជាពុទ្ធបរិស័ទ ដែលធ្វើឱ្យពួកគាត់មានឱកាសបានបំពេញបុណ្យតាមប្រពៃណី។
ឯកឧត្តមអភិបាលខេត្ត បានបន្ថែមថា ការចូលរួមកាន់បិណ្ឌនេះ ក៏ជាការឧទ្ទិសមហាកុសលជូនដល់លោកអ្នកមានគុណ យុទ្ធជន យុទ្ធនារី ដែលបានពលីជីវិតក្នុងបុព្វហេតុជាតិ ព្រមទាំងបងប្អូនជនរងគ្រោះដែលបានស្លាប់ក្នុងរបបកម្ពុជាប្រជាធិបតេយ្យផងដែរ។
សូមជម្រាបថា ក្នុងឱកាសនោះថ្នាក់ដឹកនាំ មន្ត្រីរាជការ និងពុទ្ធបរិស័ទ បានរួមគ្នាប្រមូលបច្ច័យវេរប្រគេនដល់ព្រះសង្ឃសម្រាប់ប្រើប្រាស់ក្នុងរដូវកាលចូលព្រះវស្សា ហើយថ្នាក់ដឹកនាំក៏បានចែកជូនក្រណាត់ស និងបច្ច័យដល់សីលវ័ន្ត សីលវន្តីផងដែរ៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
